自從金融海嘯爆發，成街唔係裁員就係減薪，唔賺錢又話炒人，連賺緊錢都話炒人。不過，間唔中都有例外，好似中電（002）咁，雖然舊年純利微跌2%，但高層仍然有得象徵式加吓人工。華華噚日睇中電新鮮滾熱辣嘅年報，總裁包立賢舊年總年薪（加埋年度賞金津貼之類），由1540萬加到1580萬銀，加幅2.6%；香港區常務董事阮蘇少湄就由1090萬加到1120萬，加幅2.75%。
至於董事會嘅非執董亦唔執輸，全體加埋一份，加幾多聽講係參照獨立顧問報告釐定，主席米高嘉道理袍金由45.42萬加到50.4萬，加咗10.96%。唔知班高層有冇諗過放棄啲奀豬嘅加幅，益埋下邊員工呢？