上個禮拜逾2000間零售店推行「日日無膠袋日」，以後唔再主動派膠袋，市民一時三刻都未必習慣，何況係首次打入《福布斯》香港富豪榜嘅大家樂（341）主席陳裕光呢？
陳裕光噚日出席研討會做嘉賓講社企責任，講講吓自爆最近落街買洗頭水，畀錢嘅時候收銀員問佢有冇帶膠袋？答案梗係冇啦，收銀小姐回應咗句：「我今日畀一個你，下次記住帶嘞！」
嗰剎那，陳裕光覺得有股犯罪感湧上嚟，令佢刻骨銘心，提醒自己以後要記得帶購物袋。
同台嘅零售管理協會主席Caroline麥瑞琼話，推行無膠袋日之前已經度好晒對白，等店員同顧客有良性溝通。陳裕光笑言：「唔怪得當時覺得Caroline同我講緊嘢啦！」
效用咁大，陳裕光可以考慮吓將「名句」應用喺大家樂嘅外賣，既可慳番膠袋錢，又可以推動環保嘛！
少派coupon免慢性自殺
金融海嘯第二波幾時殺到仲未知，未雨綢繆嘅升斗市民，都會袋住啲飲食coupon（優惠券）出街，實行慳得一蚊得一蚊。有讀者反映大家樂最近出咗一次coupon後冇乜大動作，反而競爭對手陸續有來。陳裕光就同華華講，大家樂不嬲出coupon都好克制，若果人客真係為coupon而來，之後覺得物非所值，最終只會變成「慢性自殺」。講到咁，大家以後咪冇coupon用？
李華華
mailto:[email protected]