粵劇名伶蓋鳴暉前晚在上水河上鄉戲棚演出神功戲《寶蓮燈》，在近尾聲時失足跌傷尾龍骨，她痛極落淚，要送院治理，表演被迫中止。蓋鳴暉已照X光及磁力共振，尾龍骨有少許骨裂，現已返家休息。
蓋鳴暉的鳴芝聲劇團，近日在上水河上鄉洪聖廟對開臨時搭建戲棚表演神功戲，以慶祝洪聖爺寶誕，前晚演出劇目《寶蓮燈》，其中一場是蓋鳴暉唱獨腳戲，有消息指她因打觔斗失平衡扭傷，但其契爺劉金耀昨日表示蓋鳴暉當時是站在煉丹爐上躍下跌倒，因而動彈不得，現場即時落幕，演出也被迫中止。
「照過有裂骨」
劇團隨即召救護車，蓋鳴暉在助手陪同到北區醫院就醫，昨日凌晨3時，記者聯絡目睹意外發生的蓋鳴暉契媽劉太，她在電話中說：「佢冇乜事，佢啲手腳都冇事，只係跌傷尾龍骨，去醫院照過係有啲骨裂，意外時場戲都近尾聲，不過中斷咗做唔到，跌親點都有啲痛，佢都痛到喊呀。」
蓋鳴暉的契爺劉金耀昨日在電話中說：「今日佢去咗醫院睇骨科醫生，做磁力共振，又照過X光，雙重保險好啲，不過家要食止痛藥。佢喺舞台上企喺約4呎高嘅煉丹爐上跳落嚟，點知個道具承受唔到啲力成個爛咗，好在佢有功夫底子反應快，唔係就個頭落地先，咁就冇得救啦！」
拍檔憂影響演出
至於前晚與蓋鳴暉同台演出的拍檔吳美英，昨日在電話中說：「佢發生意外時我喺後台，一聽見佢喺台前出事，我走出去睇吓，我見佢唔郁得，可能痛到出唔到聲，冇幾耐有救護車嚟抬佢上車，我見佢面部表情唔算太辛苦，應該冇乜事，我哋遲啲仲要做折子戲，一晚要做五場，未知佢做唔做到。」
採訪、攝影：區恩傑、陳寶明
