今日離港開會前，鬍鬚曾噚日晨咁早約見民主黨一眾頭頭，為表決預算案摸底。
鬍鬚曾最新民望急瀉，據民主黨人講，當佢哋提起民調，想安慰吓鬍鬚曾時，佢面色一沉話：「我知道啦，你講你哋啲建議啦。」崩口人忌崩口碗，有人唔想提起傷心事，都無謂勉強。
鬍鬚曾同民主黨見面，被質疑想分化泛民，爭取多啲支持票或減少一啲反對票，雖則民主黨今次獨食，但都好識做，要求鬍鬚曾日後約見其他泛民議員討論微調預算案內容，民主黨要求曾俊華正面回應市民訴求，就算唔即時加碼派糖，最少都要有實質承諾，否則要該黨投票支持預算案有難度。要鬍鬚曾開張期票呢個叫價都算好低，民主黨真係夠朋友。