公民黨班大狀平時咄咄逼人，但面對大業主，都好難講掂數。公民黨灣仔黨總部租約期滿，業主大幅加租，由於公民黨財政緊絀，惟有兩手準備，一面同業主講數，一面另覓新辦公室。湯家驊話睇報紙見數碼港呎租幾平，曾向有關方面查詢，點知未講到價錢，對方就指公民黨業務性質唔夠cyber，不符合租用條件叫佢哋過主。
外傳小小超係公民黨「金主」，數碼港唔騷公民黨，唔知對澄清雙方關係有冇幫助。其實數碼港都係個名啫，實際係豪宅，公民黨改名做電子黨、CyberParty咪符合租用資格囉！湯家驊又埋怨現時業主獅子開大口，呎租由14蚊加到23蚊，雖則講價減到18蚊，但都幾重皮。
希望搵到筍盤
湯家驊話搬唔搬真係兩難，唔搬就要捱貴租，搬新竇筆裝修費又好襟計，搞到佢近日心情煩躁腦交戰，如果各方人士有筍盤介紹就最好。好彩該黨下星期二電影籌款反應理想，達到目標約70萬元，公民黨先至可以繼續運作咋。