這邊廂鍾欣桐於九龍灣展貿復工，那邊廂麥浚龍（Juno）現身尖沙嘴海港城，出席本月14日白色情人節預祝活動，遙距發功力撐女友。剛由日本返港的他明顯容光煥發，對於跟阿嬌同日出席宣傳，心情勁靚的他說：「呢個係我公司接嘅一個工作騷，我又唔會咁諗咁樣就有緣。」人在日本，仍關心愛人動向：「其實我哋有聯絡，唔只佢，我今日都有啲緊張。佢（阿嬌）去做嗰個訪問，我覺得佢係一個好勇敢嘅人，公司安排工作而佢去做，真係好專業。」
稱男女要互相尊重
淫照風暴高峯期，阿嬌幾乎崩潰，幸好獲Juno無限量支持。日前阿嬌在《志雲飯局》也忍不住透露，停工期間曾想過結婚，Juno昨日談到此事時，突然面紅紅說：「嗰part我冇睇喎，我冇同佢傾過呢啲嘢。」記者笑他一傾便求婚？他說：「唔係嘛，朋友點會求婚呀？」
阿嬌憶述當日跟陳冠希拍親熱照，是因為最愛他、不想失去他。雖則如此，但Juno撐阿嬌撐到底：「每個人拍拖或者談戀愛，一定會好投入，但係唔可以去同任何人講有乜嘢應該做、乜嘢唔應該做。一男一女一齊要互相尊重。」至於會否同樣要求另一半跟他拍淫照？Juno說：「除咗尊重之外，做乜嘢都係雙方嘅嘢，冇可能單方面去要求。我唔會評論佢（指陳冠希）係咪唔尊重，同埋係咪要私下道歉同解釋，呢方面我唔畀意見，呢啲係人哋同埋過咗去嘅事。」
狂讚女友堅強勇敢
Juno續說：「我哋私底下都冇傾，呢啲事係人哋嘅私人事，唔方便畀意見。每個人都有過去，大家應該focus喺現在，佢（阿嬌）喺我心目中係一個好堅強嘅人，家佢復工，係好值得支持，大家唔應該針對佢所講一啲以前嘅事，大家應該支持一個咁勇敢嘅人，佢做得呢個訪問，相信有一定大壓力，相信大家應該體諒，我精神上都支持佢。」至於會否包容她？Juno斬釘截鐵的說：「唔止係男朋友，一個好好嘅朋友都需要包容，我喺呢方面從來唔覺得比其他人多，做一個真心嘅朋友係要咁。」
與阿嬌撻着後，Juno人氣勁旺，有說他借女方上位，阿嬌開腔為Juno證清白，讚他有義氣。Juno說：「其實覺得喺呢件事上，我唔認為（我）做得比其他人多。任何一個朋友有事，如果你係真心朋友，會第一個企出嚟支持，好多謝佢還我一個清白。」
有機會與阿嬌合作
女方開聲不排除有發展可能，Juno幾乎同一口徑：「我哋喺呢一刻係好好嘅朋友，當然neversaynever、冇人會有定案，呢一刻我都好支持佢專注佢嘅工作，之後有冇得發展，真係好睇緣份。」
阿嬌既已復出，那兩人會否合作？Juno就說：「我今年嘅工作未有定案，所以冇嘢可以否定。」
採訪：何慧斯
攝影：黃偉雄、林德雄
衣裳捉：豹紋顯野性熱情
潮人麥浚龍昨日捨棄最愛的mastermindjapan，改以另一東洋品牌BackBone示人，並貫徹其全身同一牌子的作風。早前他已在網誌推介這個品牌，更滿意地謂終於等到他們推出豹紋內褲和襪子，昨日果然穿上野性的豹紋襪亮相，未知會否裏外如一？至於戒指，今次Juno捨棄與阿嬌的定情戒，改以自家品牌ChapelofDawn與英國銀器品牌CrazyPigcrossover的銀戒指示人。