金融海嘯令港人投資損手爛腳，怕且為免再爆迷債風波，證監會即時未雨綢繆，加強投資者教育，破天荒咁特約贊助TVB製作互動式遊戲節目《財智達人》，由出名精打細算、但都變大閘蟹嘅嘟姐鄭裕玲主持，下星期一晚十點半首播，暫時只得十集。華華聽講證監今次贊助過百萬銀，咁計落一集都好揦脷喎。
贊助TVB搞遊戲節目
證監發言人話節目分兩部份，先有短片嘅是非題，再到個案式探討，每集有4名藝員同50名現場觀眾參與，考吓大家對期指、窩輪同股票嘅認識，最後就由證券界專家同學者解畫，已有李香琴、薛家燕、伍衞國、鄧梓峰同鍾嘉欣上台挑戰。獎金只得藝員有份，終極勝出可揀42隻恒指成份股嘅其中一隻，然後以當日股價再乘股數，換取相關價值嘅禮品，唔會派股票，形式都算幾新穎噃。