百厭星踩板最滑

以前提到滑板，家長們的印象就是一班不務正業的年輕人，沒事做深夜在大型公園搞搞震擾人清夢。自從XGame正式出現，坊間有常規的教授後，個別地區更有提供場地，滑板的形象已變得正面，成為正式運動。據教練說，其實百厭仔最啱滑，練膽之餘，勤力點更可玩出多種花式增自信呢。

記者：林佩婷
攝影：陳盛臣
Model：Priscilla

玩滑板學平衡

11歲的Adan，於4歲左右開始學溜冰，讀書時更入選冰上曲棍球校隊，7歲時開始學滑板。「我好鍾意運動，無論玩溜冰又或冰上曲棍球，最緊要就係平衡，所以我聽爹哋意見學滑板。由於我已經有類似經驗，所以好快上手。玩咗咁耐，仍然覺得滑板好有趣。有啲花式技巧好似簡單咁跳躍或S形滑行，我大約學幾個月就OK。」

最傷手指「拮魚蛋」

玩了4年，由於做足安全措施，只試過一次意外。「有次唔小心仆親，手指公直叉地下，成隻手指腫咗，兩星期後先好番。不過我無因為咁而驚咗，反而玩得更小心。」

怕醜較難教

據XGame的RiderDavid說，其實4歲以上的小朋友就可以開始學玩滑板。「小朋友學習能力強，只要玩嗰陣做足安全措拖，就可以玩得好安全。返學上堂嗰啲老師鍾意文靜同好乖嘅學生，不過我覺得學滑板嚟講，百厭星就最好教。因為佢哋本身已經好鍾意郁來郁去周圍走，咩都想試，只要同佢哋玩得開心就好易入手，加上一般夠膽，大路花式都易上手啲。相反太怕醜、太靜較為難教。」

■8歲李正賢自學兩年滑板，最愛從斜坡衝下去的感覺。

初學者宜玩四輪

小童滑板分兩類，最普遍當然是四輪Skateboard，之後係兩輪兒童滑板，David話它最初是用來學習之用。「兩輪滑板最初係俾玩滑浪同滑雪等活動嘅人用嚟喺地面練習平衡，後嚟漸漸變成獨立運動，最後出埋小童版，連小朋友都玩得。StreetSurfingBoard板面以膠為主要物料，容易耗損，唔適合玩花式，最啱初學者。之後就出咗以鐵、碳纖木等為原料嘅RollerSurfer，不但耐用而且夠韌力。不過由於佢嘅movement較大，比四輪難控制，所以我建議初學者應該先學四輪比較好。」