「閣仔巨星」霸王成，從來只揸四門房車應付屋企人，臨近七年要驗車，成大哥借意想換架好力又慳油嘅車。Sales落晒嘴頭佢買Fiat架Doblo，柴油偈有Turbo，肯定好力。早排慳油比賽，冠軍更做到$0.39/km終極數字，油費跟汽油車比較，為近1:3之比，啱晒霸王成！
記者：徐影龍
攝影：楊錦文
演出：Jacky@PureModels
月慳千幾
政府力撐混能同電車，令大家對柴油偈嘅理解仲停留喺N年前超大廢氣嘅階段。其實今時今日符合到歐盟四型引擎規格，已證明喺環保方面無問題。搵食大哥或屋企揸數嘅老婆，未必咁宏觀講環保，OK，實牙實齒同你㩒計數機；慳油比賽事實證明，FiatDoblo每公里最平可低至$0.39，講到明無熄冷氣或空波落斜呢啲邪招，比一般行$1.3至$1.5嘅私家車，慳足三分二。當你平均每個月二千蚊油錢，轉揸Doblo後只需六百多啲，足足慳千幾蚊，仲未計過隧道又平啲，家陣咁嘅時勢，慳慳埋埋當出Bonus啦！Doblo作為代步車已算一流，出車要考慮嘅只係佢屬貨Van類，要有1、2號牌，而且今時今日揸棍波有點過時兼辛苦，不過睇錢份上，架車賣相又唔似一般貨Van，算係除笨有精。
唔做「捱」上的波兒
柴油Van屬商用性質，本來副刊少介紹，不過Doblo同街邊貨Van的確好唔同，首先車頭設計到成架SUV咁，大大個鬼面罩同泵把，基本上當私家車用都唔會俾人白鴿眼，車櫳兩排位再加特大載貨區，人同車都有碇擺，私用商用兩頭兼顧到。揸得柴油棍波，200Nm扭力真係唔講得笑，二波起步濕濕碎，上大斜無幾耐已經要嗱嗱聲上三波，飆上山路一啲「捱」嘅感覺都無，勝過同級2,000cc車多多聲，呢啲都係搵食車最注重嘅韌力表現。祥龍近排將售後服務加碼，最抵玩APlan六個月或一萬公里幫你Check車同保養，包晒Caltex合成偈油、偈油隔同人工，收費$1,300。另外年驗服務只收$1,200，包埋政府Check車嗰筆，原廠保養仲平過車房收費。
「當Sales落嘴頭叫我轉揸柴油Van時，其實我是拒絕的。你不能叫買我便馬上買，第一，我要先試一下，我又不想買了後要加很多Option，那架車才又爽、又快、又嘆，結果老婆一定罵我，根本沒有這種Budget！我說先要給我試揸一下。後來我知道架車是歐洲製造的，而且歐四偈廢氣少得多。揸了一個月，這個月下來之後呢，起碼我揸得很舒服，現在每天都還在揸。我要給讀者看到，我揸完之後只係三毫九仙一公里，你們揸完之後，也是這樣子！」
Profile
引擎：1,910cc直四Multijet
馬力：105bhp/4,000rpm
扭力：200Nm/1,750rpm
傳動：五前速手波
查詢：祥龍汽車（24778208）
