警隊一哥鄧竟成做過飛虎隊，故有「特警成」之稱，下屬日後可能要改口，叫一哥做「鄧警神」！因為商業罪案調查科探員，幫一個日本商人偵破一單千多萬元證券詐騙案，呢位商人為咗多謝香港警方幫佢取回款項，特別由日本嚟到香港，頒發錦旗表揚警方，最犀利係錦旗繡上「警神」兩個大字，做差人做到變神，都算前無古人。
呢單涉及逾千萬元嘅案件，發生喺06年至07年，日本商人委託一名港人幫佢處理香港證券戶口，點知呢個代理人竟然喺五次交易中，利用複雜騙局，喺戶口入面盜取逾千萬元款項，更將贓款電滙至澳門，以為可避過追查。
錦旗繡上「警神」
最終騙徒當然被繩之於法，被判入獄3年9個月，商罪科人員仲將全數款項成功起回，交回日本事主。最新一期《警聲》報道呢位日本商人堀井邦彥失而復得，上個月送咗張「警神」錦旗畀商罪科，幫佢搵番千幾萬元，難怪當香港警察係神。
呢一期《警聲》仲有介紹警方最新「road薄落」路障裝備，警方會試用新款輕型路牌，新路障路牌睇落同舊款分別不大，總之司機見到就停車啦。