金融市場變天，作為活躍參與者嘅各大證券行，旗下要員難免要變一變。好似彭博資訊噚日引述消息話，瑞銀委任咗金弘毅（DavidChin）同MatthewHanning做亞洲區投資銀行聯席主管；蔡洪平（HenryCai）就升做亞洲區投資銀行主席，接替辭任嘅RobRankin，繼續領導瑞銀亞洲區嘅投行業務。
唔講唔知，原來40歲嘅金弘毅，舊年有份做招商銀行（3968）收購永隆嘅「世紀筍刁」；不過今年想搵番咁大嘅交易，睇怕都冇咁易。
有人歡喜有人愁，里昂證券香港區負責中國能源研究部主管Gordon關榮樂，已經離開公司，估計同佢哋前排全球大裁員約90人有關。
喺04年加盟里昂嘅Gordon，舊年曾被《Asiamoney》選為中國能源分析員第2名，雖然話金融海嘯，但相信以佢背景，要搵番工應該唔難。