美國政府三度出手拯救嘅美國國際集團（AIG），唔單止令投資者失望，連前董事兼股東EliBroad都好欷歔咁話，對AIG唔再存有任何希望。話說EliBroad同一班投資者，早喺舊年兵荒馬亂之際，曾經希望喺美國政府手上攞番AIG股權，但最終失望咁話：「迫於無奈要放棄。」
曾經係全球保險一哥嘅AIG，因極度缺水，要美國政府打救，變相持有八成股權。AIG舊年第四季勁蝕617億美金，破盡美國單季蝕到入肉紀錄，原本諗住賣資產套現還債，點知買家財力大不如前，搞到AIG封盤咁滯，索性將部份資產，例如友邦保險（AIA）賣咗部份畀政府，甚至考慮獨立上市。
AIG唔掂嘅新聞接踵而來，Broad同埋其他股東舊年曾經企圖說服美國政府，畀公眾取回AIG所有股權，最終無功而還。佢好心淡咁話，已經唔再投資保險行業，亦唔再關心AIG。