電影公司為咗拍戲，要暫時移走中西區永利街七棵日本葵，唔少居民媽媽聲咁反對。中西區區議會綠化小組噚日召開特別大會，請咗電影公司、政府同居民代表三口六面講清楚。小組委員民主黨鄭麗琼引述電影公司代表話，佢哋喺某個天台位影落嚟時發現畫面俾啲樹遮咗，逼不得已先要暫時移開嗰幾棵樹，唔係純粹因為啲樹同60年代格格不入就要逼遷喎。
電影公司最終願意讓步，將原定一年嘅保養期延長到兩年，承諾被移植嘅樹喺未來兩年有乜冬瓜豆腐，一定賠到足。但如果棵樹都死埋，仲有乜好賠？小組最後決定維持原判，容許電影公司喺3月中動土。不過有區內人士仍然忿忿不平，話會繼續跟進落去。