「號外!朗拿度入波喇!」如果我求大俠幾年前咁嗌,實俾人笑:「好出奇咩!」不過今時今日,呢位腩肉橫行嘅32歲前鋒再入波,非集合天時地利人和不可,所以絕對係大新聞!
密雲蔽日天都幫佢
「肥哨」呢個等足年幾嘅入波(上次係08年1月13日AC對拿玻里),出現喺彭美拉斯1:1和哥連泰斯嘅聖保羅州聯賽。當日氣溫高達攝氏35度,上半場球證一度吹停比賽等球員唞氣,「肥哨」人肥特別怕熱;加上係膝傷一年好番後嘅第2場,所以教練安排佢喺後備席唞凉,準備下半場出場。
下半場,巴西《環球報》話:「高溫漸去,密雲蔽日,強風驟起。」嘩!乜咁邪?48分鐘彭美拉斯領先一球,哥連泰斯勢急下,64分鐘換入「肥哨」,全場45,000球迷high晒。咁嘅天時地利人和之下,肥人有肥福嘅「肥哨」,似乎冥冥中會再做英雄。
78分鐘,「肥哨」扭動水桶腰擺脫祖馬後勁射,皮球擊中左門柱。87分鐘,「肥哨」邊線發難扭過拉莫斯落底傳中,可惜隊友頭槌攻門被撲出。比賽進入補時兩分鐘,「肥哨」接應角球升起力壓後衞頂入,追成1:1完場。對方教練盧森貝高賽後就批評球證刻意吹罰,係都要畀機會「肥哨」入波。
肥得滯整爛鐵絲網?
不過,「肥哨」咩風波未見過呀?佢入波後衝向場邊擒上鐵絲網,與球迷隔網搖曳慶祝,唔知係咪未減磅,導致部份鐵絲網倒下,好彩冇人受傷,之後警方趕至攔住唔畀球迷衝入場。「肥哨」仲因此領到一面黃牌,佢解釋話:「我控制唔到自己,助球隊後上追和,呢一刻非常特別。」
睇到「肥哨」入波後嘅慶祝動作,我求大俠都不禁眼濕濕。一個人,最緊要搵到快樂之源,否則有億萬身家都冇用。巴西人有足球就有歡樂,如今「肥哨」回歸,巴西球迷喺金融海嘯下,肯定都會過快樂嘅一年。