無綫總經理陳志雲揸弗主持嘅《志雲飯局》不經不覺嚟緊已經三周年，咁梗係要搞啲特別嘢嚟慶祝一下，日前陳志雲就請咗六位星級好友一齊接受訪問，包括楊千嬅、朱茵、許志安、呂方、李克勤同羅嘉良，節目喺星期日（15日）晚上10點喺翡翠台播出。
千嬅反客為主
席上陳志雲當然唔會放過咁好機會向幾位嘉賓逼供，其中陳志雲就不停追問千嬅同丁子高嘅緋聞，千嬅就繼續大耍太極話：「感情會一切隨緣，我係好傳統嘅女人，結婚就會生BB，如果唔諗住要BB就未必會結婚。」一向牙尖嘴利嘅千嬅仲大膽到反客為主，問陳志雲𠵱家有冇拍拖，曾經同鄧健泓及崔健邦傳出有斷背情嘅陳志雲就好大方咁話：「我𠵱家冇拍拖喎。」
許志安幾經陳志雲逼供下終於公開承認Michelle嘅女朋友身份，至於舊愛鄭秀文，安仔好堅決咁話大家冇復合嘅機會，唔知係咪想派定心丸畀Michelle呢？而呂方講到同鄭裕玲嘅感情，佢坦白話自己好唔捨得，呂方仲表示復合機會好微，言談間都充滿無奈。