有港府力撐、由泰山石化（1192）牽頭嘅商品交易所，喺淡市之中繼續招兵買馬，噚日就宣佈搵到喺芝加哥氣候交易所做高級副總裁嘅安姬斯小姐加盟，擔任法律及監察主管一職，而安姬斯當然賣花讚花香，話香港設立商品市場係大勢所趨，前景非常樂觀。
淡市中招新兵
記得商交所舊年6月中打鑼打鼓宣佈籌組嘅時候，國際原油價格超過120蚊美金，當時主席張震遠（Barry）揚言會搵巴克萊、雷曼、美林等投資大行，同埋中信集團同華潤集團等中資機構入股，趕及今年首季內推出燃料油期貨合約。
但呢項產品上海都有賣，中證監舊年8月底就表明會叫停實物交收；9月份輪到華爾街出事，雷曼破產唔在講，金融海嘯令到投資巨擘都自身難保，中信集團為救炒燶外滙嘅中信泰富（267），怕且亦元氣大傷。數吓手指，商交所打頭炮嘅時限得番廿零日，究竟會點發展？安姬斯未必幫到手，可能要Barry交代吓。