口不擇言嘅賭王何鴻燊日前喺北京發表屎論，撐澳門特首鏵哥拒絕港人入境做得啱，話唔少入境嘅人都係「攪屎棍」。本港泛民主派都好厚道，亦唔會同賭王玩屎尿屁咁低水平，但有人諗咗一招對付賭王，就係呼籲港人以後去澳門時罷搭信德噴射船，既然佢唔歡迎香港人去澳門，就無謂迫佢賺錢啦！
費事整污糟佢隻船
八方聽聞，今個星期日去澳門試關嘅泛民主派都響應呢個建議，當日如無意外會喺尖沙嘴上船。長毛大力支持唔幫襯賭王；既然賭王話香港人係攪屎棍，「到時整污糟佢隻船就唔好啦」，佢仲寸賭王講出咁荒謬嘅言論有可能係「口舌失禁」，個屁股生咗喺個口度，坐喺賭王隻船都擔心會沾咗污糟嘢。
去開澳門嘅人都知，喺上環搭信德噴射船或者喺尖沙嘴客運碼頭搭新渡輪，去澳門嘅航程差唔多都係一個鐘，新渡輪最多遲5至15分鐘咁多；價錢方面信德平雞碎咁多，泛民中人話一支汽水都買唔到，做乜一定要搭佢？不過，信德嘅船期密過新渡輪啲，15分鐘一班，新渡輪就30分鐘一班，但有泛民中人話，夾好時間就冇問題，唔好等賭王以為自己無可取代！
社福界代表張國柱今次會隨行，佢話去邊上船都冇所謂，總之會跟大隊，但佢最關心嘅反而係：聽聞新渡輪嘅船比較拋，最驚拋得滯會暈船浪，呼籲同行嘅人最好都係帶定暈浪丸，以免意外地試關成功後，未着陸已經因為身體不適而要返香港。
泛民3.15試關前幾日，公民黨秘書長陳家洛會以學者身份獨自去澳門，參加由Asia-EuropeFoundation舉行嘅學術交流活動。過去都喺信德上船嘅陳家洛同3.15團友心靈相通，決定當日由尖沙嘴出發，用行動表示不滿。佢話聽到賭王講屎講得咁興起真係火都嚟埋，大鬧離譜，唔想賭王要咁委屈賺啲唔鍾意嘅人嘅錢囉。
陳家洛唔敢諗今次入唔入到境，總之希望得到應有人權。但佢事先講明，如澳門再請佢食檸檬，一定唔會同佢客氣，好有可能會透過司法程序爭取公義，證明畀鏵哥睇：香港人唔係好蝦。
mailto:[email protected]