上周五畢傑兄喺〈早飛倉〉推介兩場波，做大嘅費倫就輸，反而做細嘅飛腳就中到正，真難搞；不過既然本欄貼日本波較順，周中一於博川崎前鋒，喺亞冠盃首戰揚威，主場可大勝中超嘅FC天津。
中超未開天津冇態
前鋒日聯開鑼戰無疑幾令人失望，主場對柏雷素爾只迫和1:1，我都損手；不過睇番賽後報告，戰況真係一面倒，前鋒射門比對手多12次，鄭大世只入一球真係唔抵；今次前鋒再度主場出擊，除咗矢島卓郎因傷缺陣外，可以「夫添」出戰；而且佢哋07年都踢過亞冠盃，累積經驗唔少，有望今場分組賽旗開得勝。
FC天津以上季中超第4名資格，得以參加今屆亞冠盃；球隊都算有誠意，簽入6名外援及土炮增加實力，當然最為人認識，係前羅馬中場悍將湯馬斯；不過呢位霉友要喺中超打滾，仲有幾多貨賣大家心知肚明。加上新一季中超未開鑼，FC天津只靠友賽提升狀態，上仗主場都輸畀FC長春，今次遠征東瀛，更加難睇好。
博曼城炒起阿爾堡
周四歐協盃16強首回合，曼城主場威力夠，就算有羅賓奴同比拿美等傷兵，憑回勇嘅胡禮菲臘斯，上仗輕取阿士東維拉，證明攻力未受影響。歐協盃已成曼城最後攞威機會，今次主場對阿爾堡；雖然對手喺歐聯曾作客賽和曼聯，好似好勁，不過當時曼聯已穩奪出線權，有留力之嫌，呢個戰績只係假象，信曼城今次，可贏多於一球，[-1]可以早捧。
牽牛
早飛王貼士
星期三2川崎前鋒vsFC天津
首選：川崎前鋒勝（1.42）
次選：川崎前鋒勝[-1]（2.2）
冷選：川崎前鋒勝3:1（10）
早飛倉
主菜：星期三2川崎前鋒勝（1.42）@$1,500
渾水摸魚過關：星期三2川崎前鋒勝[-1]（2.2）x星期四6曼城勝[-1]（2.25）2x1@$500
今日早餐價錢：$2,000
上日賺蝕：-$2,000
早飛倉結餘：$77,421
規則：$100,000本錢，每日買早報最多動用$5,000，最少$1,000，逢周二、五見報。
周中焦點
星期三6曼聯vs國際米蘭
兩軍在歐聯16強首回合未分高下，賽和0:0；今仗雙方都有後防主力或因傷缺陣，可否反數據開出入球「大」？兩大名帥費格遜及摩連奴，誰又可到最後？
星期四8烏甸尼斯vs辛尼特
衞冕歐協盃的辛尼特，未受主力艾沙維離隊影響，上圈兩回合均勝史特加晉級，今次16強首回合作客烏甸尼斯，又能否延續勝仗？