由南航（1055）空降到東航（670）做董事長嘅劉紹勇，唔經唔覺已經返咗工80日，有乜感想呢？內地傳媒引述劉總話，每日返工就係「白加黑」（華華估係由朝做到晚），每個禮拜返工時間係「非常6+1」（即係7日做到足），希望未來一年係「幸運52」（一年52個星期都咁幸運）。而𠵱家東航最需要嘅係變革，就算刻不容緩同爭分奪秒都唔夠，係要跨越時空畀時間倒流先至得！
正喺北京開緊人大會議嘅劉總，仲想透過復星（656）老闆、浙江商會會長郭廣昌，幫佢約阿里巴巴（1688）老闆馬雲見面，因為劉總覺得數碼化至係航空業最高形態，「如果航空公司的信息化上不去，永遠是被動挨打的打工者」。
叫郭廣昌穿針引線
對於東航𠵱家資不抵債，佢就話：「政府決定救東航，已經換了班子、給了票子，然後就要看我們怎麼找路子！」睇嚟大家真係要放長雙眼睇佢有乜法子。