立法會主席曾鈺成近日開始輪流約見唔同政黨，開展佢嘅鈺成飯局。民主黨上星期一率先同曾主席食飯吹水，九位議員到齊晒，非常畀面。據聞席間大家都係風花雪月，唔多唔少傾到社民連踩場事件，聽聞當場仲上演咗一幕民主黨「真兄弟」事件，張文光喺事件中慘遭毒害。
西米布甸發霉累事
話說張文光當晚食到飽一飽返屋企後即刻覺得唔對路，肚痛之餘又狂嘔，懷疑係咪有人乘機落毒？但得悉其他黨友都冇事，正懷疑緊係咪佢自己抵抗力差。但何俊仁同李永達第二日竟然笑笑口同佢講，應該係食飯嗰度啲西米布甸甜品累事，事關佢哋兩個食咗一啖，覺得唔對路就即刻吐返出嚟，高達仲見到個甜品發咗霉，可惜佢兩位竟然知情不報，難怪俾唔少黨友形容為「真兄弟」。
受害人張文光講起呢單民建聯涉嫌毒死民主黨事件都覺得好笑，話將第一啖西米布甸擺落口時已經覺得酸酸哋；但佢以為係特色吖嘛，一口吞咗佢就算，點知係發霉？佢承認嗰啖比較大啖，所以最終都肚痛，最醒目係卿姐，見到仁哥同高達唔食就即刻耍手擰頭，避過一劫。