自從雷曼迷債單嘢爆出後，銀行前線銷售人員做晒箭靶，事關唔少苦主話係聽銀行職員講，先至買雷曼迷債，搞到今日蝕晒老本。華華聽一位大學教授講，佢嘅同事一直有為金融機構，好似銀行同保險公司嘅前線員工開talk，講吓有關金融同保險產品嘅相關知識。
喺雷曼迷債事件後，佢同事就收到某家金融機構「求助」，請佢做客席講師，同班前線分行嘅主管「補習」，教佢哋喺銷售投資產品時，要注意嘅事項。教授話，呢啲就係不折不扣嘅臨急抱佛腳嘞！
雖然係事後補鑊，但都可以話係面對現實，改正錯誤。不過，華華諗，究竟銀行搵專家嚟，係想提高前線人員嘅水準吖？定係教佢哋賣嘢時嘅技巧，出事時點至唔使孭鑊，或者點樣sell嘢先唔會「賴嘢」呢？