我求大俠最信一句話，就係「同人唔同命」，你睇傅家俊（Marco）同蘇樺偉就知。大家都係叫「神奇小子」、屬同一經理人、上個月又一齊攞「傑運」獎、前排仲一齊接拍B字頭飲品電視廣告，聽講連酬金都一樣，有六位數字；不過拍攝過程入面，兩個「神奇小子」嘅遭遇就差天共地喇！
Marcopot吓波袋六位數
Marco一向官仔骨骨，估唔到連廣告商都錫住佢。拍攝當日，Marco着番自己套士碌架戰衣，加埋私家cue，再趴喺波枱交幾個cool爆眼神，然後pot吓波、飲吓水，就袋走六位數字酬勞。連Marco都話，拍廣告易過平時練波，事關練波起碼幾粒鐘，而且要集中精神；拍廣告呢，拍完個pot波look，又可以起番身唞唞，唞夠先拍第二個look，途中重有化妝姐姐執靚仔啲㖭！
相反偉仔就辛苦好多喇！當日晨早9點幾去到西貢成豐影廠現場，拍攝期間一直俾大光燈射到「㷫」都算喇，最慘係要喺只得3、40米長嘅假跑道上，不斷擺手扮跑步，而且要記住望鏡做表情，最後仲要嚟多吓壓線衝刺。
偉仔起勢跑好辛苦
為求逼真，化妝姐姐不斷喺偉仔塊面同頸噴水，務求睇落去似出晒汗；結果NG咗十幾廿次，搞到偉仔都忍唔住話凍。我求大俠喺旁邊睇到都戥佢辛苦，我諗佢媽媽睇到仲心痛。不過，蘇媽媽好識做，被記者問到會唔會心痛，佢就答得好大體：「唔會，都幾新鮮呀，我要多謝廣告商睇中佢就真。偉仔都知呢個世界搵錢艱難，今次呢筆錢對我哋家庭經濟好有幫助㗎！」Marco亦都話，能夠同世界紀錄保持者（偉仔）一齊成為代言人，感到非常光榮；而且可以令更多人認識桌球，真係一舉兩得。
我求大俠提提大家，呢個廣告分3個系列；除咗香港兩位「神奇小子」，NBA火箭嘅中國中鋒姚明都有份。3個嘅廣告都會喺今個月16號嘅黃金時段出街，到時除咗睇吓邊個靚仔啲，亦唔好忘記多多支持本地運動員呀！
