正所謂「女為悅己者容」，試問又有邊個女人唔貪靚？一向打扮入時，身兼全國政協婦聯界別委員嘅中國女電王、中國電力（2380）董事長李小琳應該都唔例外，華華見佢每次出席公開場合都會悉心打扮，點只衣着光鮮，直頭一身珠光寶氣，輕易成為全場焦點。
據聞李小琳每次出席活動前都有專人負責幫佢執形象。
LV圍巾今季春夏貨
華華噚日同兩位做名店嘅朋友傾開偈，佢哋同華華講，李小琳3月3號喺北京出席兩會政協開幕時，頸上圍住嗰條粉紅色LouisVuitton圍巾，係08年尾推出嘅春夏款式，條圍巾出咗粉紅色同黑色，價值2850元。𠵱家只係得番粉紅色，有買趁手！
仲有，佢3月5日着嘅淡綠色收腰外套，上面有幾朵山茶花胸針裝飾，同一向以山茶花作靈感嘅Chanel相似，名店朋友講，齋睇相唔可以百分百肯定件外套係咪Chanel嘅出品。
胸針貴過打工仔月薪
不過名店朋友話，佢哋朵絹面胸針可以單買，唔少客買嚟自己襯衫，每個大約2000元左右，視乎款色同大小而定。如果一件衫有3、4個胸針，咪差唔多內地打工仔幾個月嘅月薪？
李華華
mailto:[email protected]
