自從政府喺07年實施辦公室全面禁煙，中環各大商廈對出嘅地下經常人頭湧湧，「煙火」鼎盛。朋友賓架M就成日同華華講，要收料最好落樓去煙格。
因為禁煙後，上至總裁，下至clerk仔，都喺同一地方食煙。又因尼古丁令人思路清晰，一眾煙民傾起某個話題，就會聽到跨階層嘅睇法。
咁中環煙格是日討論係乜？咪就係加煙稅同供唔供滙控（005）。金融海嘯已形勢迫人，鬍鬚曾又無端端加煙稅，煙賣到差唔多40蚊包。𠵱家滙控仲要供股，真係唔食煙都俾佢搞到氣咳。
賓架M話禮拜五下晝喺煙格聽到，隔籬部門某個同事話：「睇到滙控咁，戒煙喇！」賓架M問係咪因公司冇花紅，佢又成手滙控，所以要慳錢供股？
同事答：「以前一百幾廿蚊股時，一股滙控買幾包煙。𠵱家？一股買得一包，如果每日食一包，就燒走一股滙控！」賓架M話，如果真係咁計就肉痛，睇怕唔戒都唔得。