今年係三八婦女節100周年紀念，𠵱家嘅女性待遇顯然比100年前好好多，男主外、女主內嘅分工已經唔係必然。喺法律界獨當一面嘅余大狀噚日自爆，通常佢屋企去買餸嘅，係佢老公胡健維而唔係佢；幫三個囡囡默書、背書，都係由老公負責，事關佢見到阿女背書甩咳會好𤷪𤺧，因此被老公停止佢擔任呢個重任。
一般家庭通常都係由阿媽出席仔女嘅家長日，但余大狀只係去過一次咁多，因為佢曾經喺家長日上同老師有啲拗撬，結果佢老公又自動請纓代佢去，可能費事余大狀同人吵大鑊。余大狀仲踢爆佢老公最近仲幫阿女做功課，而且仲好高分㖭，睇嚟胡大狀對老婆同阿女都係一視同仁，一樣錫到燶。