SHARP搞祖國化　免改機駐港插旗

每次提起用SHARP手機，鑊氣特別多，但所講嘅係日本水貨!傳聞改機佬要花十幾萬幫佢「裝身」，亦只係睇到日、英文介面，最慘係訊號接收唔穩定，咁樣煎皮拆骨，難怪班Fans用到扯火！不過SHARP去年底終於進軍我哋祖國，還換上新名字，在2月份從水路進駐先達。雖然中、日版本有成千蚊差價，但買個安心，點都值得嘅！

記者：陳國輝　
攝影：陳盛臣

跟扁腳充電器包裝唔寒酸

當第一次見到日版SoftBank或者NTTDoCoMo嘅手機包裝，或者會覺得好寒酸！皆因佢幾乎係一個純白色紙皮盒，而裏面更簡單地只用透明袋入住幾件Accessories及說明書，絕對唔似日常所見包裝精美嘅日本產品。
勢估唔到，祖國化後竟然變豪咗，以SH1810C為例，佢採用全黑色膠盒分兩層放置配件，外面再套多個灰銀色紙皮，點睇都精美啲。再者，每逢日版機都需另配充電器，中文版就送埋（中國制式），畀得幾千蚊買嘢，當然想配件齊全。

■中文版包裝得靚啲，盒面仲有大大隻SHARP字！

■為安全起見，最好配個港式三腳充電器先穩陣。

2G制式免解SIMLock

基本功能如影相、拍片、插記憶卡等，同日版機根本毫無分別，唯一要留意係國內一直採用GSM制式，所以呢批SHARP亦都僅支援2G，接收訊號方面難免不及雙制式（3G/2G）可隨時切換網絡咁方便。
話說回來，中文版點都好過日版機要先解Lock，再插入HyperSIM咁麻煩。據Sales講，其實好多日版機都收唔到3仔網絡，唔少人仲係買咗先知中招，就算其他3G台有訊號，表現亦唔穩定；相比下，行2G嘅中文機似乎更有優勢。

■試過可接收晒全港6個2G台。

■左邊嗰張係HyperSIM，日版機要插住嚟用，超煩！

■鋰電池寫明「MadeinJapan」，日本製造，Fans放心好多。

繁簡顯示拼音筆畫輸入

以往玩日版機要犧牲好多嘢，例如明知網絡接收唔穩定，或部份多媒體功能被鎖死，甚至純日、英Menu亦接受得到，簡直要用死心塌地嚟形容呢班Fans！今次終於出中文版，唔使講梗係親切好多，雖然得簡體Menu，但試過睇繁體中文SMS亦無問題，即係話唔會出現怪碼！但係要留意，文字輸入僅支援簡體拼音或筆畫兩種，仲內置埋聯想字庫，如果你唔慣寫簡體字，呢項功能應該幫到手。