財爺鬍鬚曾加煙稅令好多煙民反感，有煙民為抗議「暴政」，以示對高官只許富豪飲平酒，不容窮人食平煙做法不滿，喺網上號召同道中人今個月22號星期日上街遊行。佢哋指，既然吸煙同飲酒都無益身心，醉駕更加害人不淺，點解政府要「厚酒薄煙」呢？選擇性調高煙稅，不單止歧視煙民吸煙權利，亦都令基層小市民百上加斤，況且加煙稅亦不見得會令煙民人數減少，質疑加稅以維護健康為名，實際係劫貧濟富。
遊行22號下午3點喺中環遮打道行人專用區集合，之後操上政府總部示威。吸煙與否係個人選擇同喜好，八方冇意見，但鬍鬚曾與煙民為敵，對民望可能有一定壓力，但佢唔稀罕掌聲，煙民都奈佢唔何。