素不相識之美國報紙記者打電話嚟，要求訪問講滙豐。左丁山為之愕然，問佢點解，記者報上名來，話係老闆（上司）編輯Ｐ吩咐嘅。咦，講起先至記得，與編輯Ｐ不曾見面。起碼有五至七年，仲以為佢已經奉調回國，在紐約返工㖭。既然係編輯Ｐ推介，唔見唔好意思，於是與呢位記者Ｃ見面。
問記者Ｃ做咗幾耐，佢話出道不久。香港父母，在多倫多出生長大，普林斯頓大學歷史系畢業，因為在普林斯頓學過普通話與中文簡體字，於是紐約方面派佢返香港做記者。識中文就有呢個好處，如果淨係講英文叻唔叻，普林斯頓多的是。記者小Ｂ同樣在多倫多長大，入讀芝加哥大學，但因為唔識中文，返到嚟香港就吃虧不少。另外有幾位世姪、世姪女自中一開始就到英國讀書，劍橋/牛津/LSE等學校畢業，但同樣寫讀中文好唔掂，考政府EO或AO一定肥佬，佢哋本是醒目叻人，有國際視野，言談勝過本地大學畢業生，無奈不識講廣東話，唔入得政府，今時今日，嘥料也。
記者Ｃ識得中文，本來是優點，但原來佢只識簡體字，左丁山畀本「香港金融史」之類書本佢睇，佢似乎睇唔明，有困難，即係話睇本地報紙唔多得啦，作為外國報紙記者，未嘗唔係有所損失。左丁山以為學中文要學繁體字，識繁體字，到大陸睇簡體字，十分容易上手，反之，在學校（例如漢基）學中文，只學簡體字，將來十分吃虧。奉勸一啲家長，如果你成日埋怨香港學校差，香港教育唔掂，你要將仔女送去英美澳加讀小學中學大學嘅話，唔該叫佢哋在外學好繁體字。
記者Ｃ不愧名校出身，名報訓練，問得有板有眼，可造之材也，多口問佢人工有幾多，原來係本地同行中文記者而又係年資相近者嘅兩倍，唔怪得對工作如此投入。記者Ｃ留下名片，立即打電話畀編輯Ｐ，編輯Ｐ話好鍾意香港，唔經唔覺已在港工作近二十年，相信以後唔會返美國，會在港退休，有佢在，佢張報紙寫香港問題，有時係十分到肉嘅。