敏妮相信努力會有回報，喺家陣嘅經濟環境下，同敏妮一樣努力求存嘅朋友相信唔少。上個禮拜，敏妮深宵時分睇電視，輕鬆一吓，睇到有線電視播咗一齣日劇《人生補時》，好值得同努力求存嘅朋友分享。
呢齣電視劇係單元劇，意念嚟自足球比賽補時，球賽本來已經完場，但球證補時，球員把握短短嘅補時階段，踢出更滿意嘅賽果。《人生補時》嘅內容亦一樣，每集嘅主角都走到人生完場一刻，呢個時候會有幾個「球證」舉起補時牌，延長佢生命多幾粒鐘。敏妮睇嗰集，係講一個工作狂OL，入到心儀嘅大企業，憑努力工作爬到管理階層。
追求理想無悔努力
日本女性一向冇乜地位，佢付出嘅努力可想而知，由於只顧工作，公司當屋企，朋友約會常甩底，公司同事當佢異型，除咗屈佢請食飯，只會喺佢背後取笑佢。
有一晚OL心臟病發死咗，喺人生補時階段，佢先發現死嗰日係自己生日，即刻喺之前好想、但冇時間去食飯嘅法國餐廳book位，又臨時打電話約佢嘅朋友去嗰度慶祝。餐廳嘅waiter見呢位OL朋友未到，得一個人咁悶，就同佢傾偈。位waiter讚呢位OL唔單只外表漂亮，亦有內涵。OL亦同佢講自己的確好努力工作。由於補時有限，佢等唔到啲朋友去嗰間餐廳，但餐廳廚師為佢做咗碟美味嘅菜式。原來呢位廚師係佢之前男友，OL為追求理想，無奈同男友分手。
何為人生真正財富
到咗補時尾聲，OL望住星空，講咗句冇後悔一生人為咗努力向上爬，而放棄咗好多嘢。
敏妮突然間諗起一句聖經金句「人若賺得全世界，賠上自己的生命，有甚麼益處呢？」理財就係要管理自己嘅財富，但有冇諗過乜嘢至係你人生最重要嘅財富？
溫敏妮
http://wanmanli.com/blogs/