轆Book：楊洛婷XAudiTT　AI進化

女人同男人對車態度嘅分別，就係麻甩佬一旦愛上，會不眠不休去了解同改裝；女人就唔會俾規格同數字所吸引，好似Rabeea楊洛婷咁，夠膽喺街遇過TT10次都話靚，但居然下次又唔記得車款同車名，而且女人揸車最好有咁簡單得咁簡單，完全唔介意電腦進化到Control所有嘢，一個D波踩到尾絕對係應份。

記者：徐影龍
攝影：陳陶鈞
鳴謝：AudiHK

Rabeea近排狂做主持，由TVB到其他品牌Event都有Job，但我第一次被佢吸引反而係周六播嘅《問問MasterJoe》，扮一蚊Joe個AI助手，雖然無乜機械人應有嘅演技，但密實衣着包唔住完美曲線，一聽佢把聲，不期然望住電視機，「我個AIUpgrade咗嘛，所以唔會硬手硬腳無表情，似番個助手就得。」除咗魔術師之外，邊有女助手咁噴血？
做番資料搜集先知走寶，Rabeea唔扮助手做搵真銀主持時，係咁意低胸晚裝露兩手已技驚四座，一輯BikiniCatwalk、俯身做瑜伽相，屬電車男網誌必擺相片之一。講開身形，Rabeea情有獨鍾愛上AudiTT外形，但對車認識近乎零，「我試過喺街遇過『呢架車』好多次，覺得佢有型得嚟又好靚，朋友每次不嫌其煩話我知係AudiTT，但下一次我又會再問過，唔係無記性，只係證明我真心鍾意『呢架車』。」

■喺兒童節目扮AI女機械人，進化到同真人一樣，唔使木口木面。

■大量高科技進駐AudiTT，由行車數值調校到座椅冷氣，全部自動化。

■毋懼雄厚馬力，兜完圈熱身即踩油揚長而去。

最簡要全自動

對車要求唔大，訪問無話題，惟有旁敲側擊講吓佢明珠台個《港生活．港享受》，「我做過架BenzB-Class，令我印象難忘，佢識得自動泊平衡位（即係S位），軚盤自己郁吓郁吓就搞掂，架車個電腦好勁！」其實電腦仲有好多叻嘢，識得幫你轉波時補油、劈彎會調校兩邊輪胎轉速、失控煞車識得扭軚救車、扭力唔夠同你拖低一個波……靚女聽唔入腦，懶理家陣汽車電腦進化得幾厲害，最緊要D波夠行同賣相吸引。
以為Rabeea唔敢試揸TT，點知一影完相佢立即拉埋另一記者跳上車，撻匙走人。車行Sales望住我，我強作鎮定講，「佢OK㗎！」起初圍住迴旋處兜圈，熱身一輪，開始飆下直路，穿過十字路口，離遠見佢開開心心，好盡情咁揸，完全無俾AudiTT嘅250匹馬力所嚇窒，叻過好多男人㖭。落車時Rabeea神態自若，原來揸咗十幾年車，外國同香港路面環境滾瓜爛熟，單門跑車？濕濕碎啦。原來繼性感尺度後，我又多一樣睇小佢。