澳門呢排發癲咁拒絕香港議員、學者、記者入境，除咗鏵哥一句「依法辦事」嘅廢噏回應外，到𠵱家仍冇任何合理解釋。澳門治安警察局代局長李小平噚日被記者問到，對唔畀港人入境同香港泛民準備試關有乜回應時，居然以呼籲市民同警方合力打擊罪案之類，答非所問嘅說話嚟迴避問題，充份展示「乜膠」（Macau）式官員嘅「乜膠」（Macau）式答案。
問呢樣 答嗰樣
李小平噚日出席當地特警總部開放日，被港澳記者扑咪問佢，拒絕入境嘅人士係咪喺黑名單內，佢先答話：「澳門治安警察局非常重視發展警民關係，一年一度開放日嘅目的係深化警民關係……」
記者再問佢嚟緊有香港民主派議員去澳門，會唔會唔畀佢哋入境呀？李代局長臉不紅耳不赤咁繼續玩嘢：「在此我補充，今日有二百幾名警員獲得嘉獎……」記者繼續問，佢繼續話之你，居然呼籲埋警民合作打擊罪案。
難得啲記者仲鍥而不捨，問佢咁學者犯咗內部保安綱邊條？對澳門治安有乜危險呀？佢先「認真」啲咁講句真心話：「今日我要講嘅已講完，其他嘅冇乜好講。」呢啲「乜膠」式答案，真係澳門先有，將來可以申辦列入文化遺產，連當年我哋老董向記者講早晨，都要企埋一邊。
講番泛民呢個月15號試關，八方聽聞，好多人都未必能抽到時間撐場。好似幫緊十姑娘同賭王何鴻燊打官司嘅何俊仁咁，原來一早另有安排，唔可以加入闖關行列，一定唔會同賭王喺澳門撞正，避免寃家狹路相逢，唔使畀賭王話佢攪屎棍。
不過，飯盒會召集人何秀蘭對今次試關仍然好有期望，話晒佢喺上年11月都過到關，考察咗當地嘅古蹟古物，身為保育悍將嘅佢希望再次踏足澳門，因為嫌上次行嘅地方太少，睇到嘅保育建築唔夠全面。佢話泛民喺起行前都會再聚一聚，至少要夾定錢買船飛，希望就算係嗰百零二百蚊，泛民今次都唔使嘥啦。
至於計劃下星期到澳門出席學術交流嘅公民黨秘書長陳家洛，唔少黨友都為佢送上祝福，但就暫冇計劃陪佢一齊過江。佢黨友湯家驊笑言，家洛咁大個人，相信入唔入到境都能夠處理到，但佢已經提醒家洛今次要穩陣啲，買張單程船票去澳門就算數，費事隨時蝕多百幾元。
mailto:[email protected]