轆Book：絕版紅

從來車會聚會，都係令人大開眼界嘅好機會，好似呢日車會會長一聲令下，多部絕版紅驅齊集，若然當日無落雨，實行賓虛場面。之但係，呢個場面都依然夠撐，全場絕版車喎，仲要部部係當年話題車，點可以唔興奮？

記者：梁美甜
攝影：梁細權
鳴謝：日本絕版車會

罕有未必貴絕

罕有唔一定貴，呢日同場其他紅車，全部都已經停產，絕對稀有。係咪部部車都係貴到嚇死人？未必，可能時下一部SuperCar都貴過佢哋，最重要係，會員大多係將呢啲車儲起，而唔係作日用。

91ToyotaAE92當年好跑得

輝哥鍾意車，自言只係收藏幾部車，「我儲嘅車部部又靚又行得，大部份仲係日本車㖭，幾十年前最流行嘅係日本車，好似豐田、本田咁。後生時買唔起，𠵱家負擔得嚟咪玩吓，呢部車當年好貴，而且副偈係原裝，好力又好玩！」話晒當年鮮有Supercharge引擎，馬力輸出達140匹，當年好勁。

■AE86靠電影紅咗，AE92本身已經好紅，仲好跑得。

■馬力高達140匹，當年日本車嚟講，都算好強。

91AlfaRomeo164歐洲名師的士

Leo儲埋80多部車，佢話玩車豐儉由人，「我呢部有晒歐洲房跑大包圍，硬朗又有型，紅色又搶眼，好靚！」係，仲好似市面舊的士咁，因為咁，搞鬼Leo仲專登搵埋的士裝飾，將Pininfarina設計嘅羅密歐變身成為落錶接客的士。」照計呢款車應該係164型號，中國人忌諱改叫168。

■第一眼以為呢部係九龍的士。

■睇真啲係Alfa168至真。

93Ferrari348少有絕版

祥哥收埋收埋都有成10部車，好彩老婆大人支持，問珍藏入面最鍾意係邊部，居然答：「最鍾意老婆！」知道！咁呢部絕版拉利又有幾巴閉呢？「珍藏車入面得呢部係紅色車囉，自己反而最鍾意00年前嘅Mini。」

■拉利348產量唔多，現時健全又行得走得嘅更買少見少。

■舊式開篷車個篷都係手動移開，行車時落雨就無得搞。

93DaihatsuCharade意大利改裝

傑佬係全場輩份最細，「我都係5年前識會長，之後就開始玩車，儲埋十零部車，呢部車平時收埋，因為啱主題咪專登洗一洗再嚟玩！」佢話自己部收藏罕有又特別，「當年原裝車已經係由意大利改裝名牌Detomaso設計，仲有原廠Recaro桶椅，夠晒特別。」睇真頭燈好似唔同噃？「係呀，潮流興改車，咪換HID大燈、軚同埋個避震。」咁仲係咪原裝車呢？

■傑佬最鍾意收藏罕有車，呢部日本車由意大利改裝車名牌設計嘅大發仔啱晒。

■原廠就配備Recaro跑桶椅，當年都咪話唔巴閉。

福絕全城

福唔只係呢刻幸福感覺，更係指呢部應該係全城唯一一部嘅福特FordACCobra302，89年由新西蘭推出嘅復刻版係由會長大眼仔所擁有，「8、9歲第一次喺老竇本雜誌入面見到呢部車就覺得好靚，即刻鍾意，我仲儲埋登過呢部車嘅書、雜誌，同模型車㖭。」一見鍾情唔一定對人，「從來無諗過可以擁有佢，幾年前無意中喺廣告入面見到前車主出售，電話打都打唔切，車主最終知我係有心人至讓畀我。」呢部車連埋今次都係落地三次咁大把，就連會員都話叨我光至有機會見到部車，仲唔乘機睇個夠、影個夠！」係，連我都要影多幾張相做珍藏。

■大眼仔自細就鍾意呢部Ford，仲係靠呢份長情心意感動到車主出讓呢部車。

■車身流露古典味，加上車身拉花增加跑味。

■Cobra既有英國賽車味道，同時流着美國跑車血統。

■外表老爺，副偈馬力輸出一啲唔弱，高達230匹，極速160，係英里。

■最吸引人係車頭呢兩部風扇，幫副偈散熱。

■男士選車櫳最佳設計，係HandBrake棍設於乘客位，拉Brake唔覺意摸錯位都得。

入會一次睇個夠

原來「日本絕版車會」嘅會員並唔限於收藏日本車，「絕版」先係主題，現時會員大約200人，每月不定期舉行聚會，最盞係會員儲埋唔少絕版車，去一個聚會隨時正過入一次汽車博物館，有錢都未必睇得到。

網址： http://www.jpcc.org.hk
年費：$200
查詢：97568887