泛民今個月15號有好節目，各黨派議員一齊去澳門「試閘」，測試入境黑名單底線。為增加聲勢，佢哋仲號召黨員參加，最好湊夠一百幾十人出發，如果澳門一刀切落閘全部人打回頭，隨時係國際新聞。
不過八方聽聞呢個「試閘團」暫時反應一般，各政黨普通黨員興趣不大，有人話可能自己根本不在黑名單上，隨團出發反而上榜就弊；亦有人話由於稍後要到澳門公幹，恐防今次玩大咗，自斷去路好麻煩。曾遭澳門無理拒絕入境嘅民主黨員何淑萍則已報名，佢話既然一早喪失入澳權，跟大隊亦冇蝕底，博一鋪可能失而復得㖭！
同名同姓都遭殃
市民可能認為政客食閉門羮咎由自取，其實封殺民主派隨時殃及良民。民主黨區議員陳樹英同八方講，最少兩個與佢同名同姓街坊，多年來次次返內地都慘遭刁難，過關時被問長問短，最好笑其中一個係男性，無辜受牽連十分無奈。「政版」陳樹英98年被內地拒絕入境後絕足大陸，免得自找麻煩，亦唔好拖累其他「陳樹英」，佢話總之唔會再到國內，關員唔好再留難「陳樹英」嘞！