全國人大會議喺北京舉行，對一眾港區人大嚟講，除咗第一日開幕禮上，溫總宣讀工作報告好重要外，噚日佢哋開小組討論會，就如溫總咁話係「重中之重」。事關主管港澳事務嘅國家副主席習近平，親臨聽佢哋「噴口水」畀意見，一年一度御前吹水獻技，當然不容有失。
港區人大限時發言
不過八方聽聞中央今年搞搞新意思，只限六個港區人大發言，而且每人限時七分鐘，之後習副就快閃。為國家出言獻策係光榮任務，所以各位人大都將真知灼見寫成十頁八頁講稿，要佢哋長話短說七分鐘內完事，形同小學生天才表演，唔係小兒科。
其實習副列席一個半小時，時間應該好鬆動，但有人大稱，表面睇90分鐘好多時間，但扣除同領導人握手問安、影相，加埋習副solo發言，已經差不多成粒鐘，六個人總共發言42分鐘，時間真係好緊逼，因此獲發言機會嘅人大都好緊張。陳智思就同八方講，佢份講稿有十幾頁，冇可能七分鐘內讀完，惟有只讀關鍵要點，至於佢重點想提出協助四川重建嘅提議，就要以書面交領導人過目喇。
可惜唔係個個有急才，八卦消息話部份人大唔想白費心血結晶，急口令咁讀完講稿，習副聽唔聽得切都唔知；亦有人大不諳普通話，讀到甩頭甩骨。噚日習副列席港區人大小組會後，就轉去見澳門人大代表，逗留約一小時，時間短啲，不過冇限發言時間，總共有五個人大講嘢。
厚澳薄港不絕於耳
習副是否厚澳薄港，成為港區人大最新耳語話題，有人認為既然香港冇大事，習副禮節性與會已經係最大支持，反觀澳門今年多事幹，領導人關切理所當然。八方隔岸觀火，恐怕習副快閃，只係怕咗一班吹水黨，中共以文山會海聞名，幾十年嚟培育出一班水花四濺唔識閂掣嘅特權階級，放任無數人大、政協開會時向領導人噴口水不管，隨時浸死習副，下指示限時發言，實乃共產黨肅清吹水黨絕招，正是怕死不當共產黨，怕煩就要陰亁吹水黨。