【淚眼告解之母女情深】因淫照事件而停工1年的鍾欣桐（阿嬌），日前接受《志雲飯局》訪問細談與陳冠希的感情關係和拍淫照原因，而事件爆發後一直保持緘默的嬌媽，昨日也首度透過阿嬌經理人霍汶希開腔，為愛女打氣，她說：「阿嬌選擇香港作為復出嘅第一站，係因為我希望阿嬌喺邊度跌低，就喺邊度企番起身。」
淫照女主角鍾欣桐的《志雲飯局》訪問雖然昨晚才播出，但無綫日前在新聞時段及《東張西望》播出訪問預告片，已引起極大迴響，除不少網民批評阿嬌受訪時似背稿和喊得假，以及廣管局前日收到215個不喜歡見阿嬌在電視出現的觀眾意見電話外，無綫前日和昨日也合共接獲69宗投訴，認為無綫不應該訪問阿嬌，及不應在新聞時段播出預告片。雖然無綫昨日再接獲80個支持阿嬌的電話，但阿嬌今次復出無疑艱難重重。
「佢會堅強面對一切」
阿嬌在訪問中謂家人的支持令她重新站起來，自淫照事件去年初爆發以來一直未有開腔的嬌媽，昨日透過阿嬌經理人霍汶希繼續撐愛女，表示希望阿嬌不要再選擇逃避，勇敢面對自己的將來。之前曾有傳阿嬌會先在內地復出，對此嬌媽說：「其實阿嬌選擇香港作為復出嘅第一站，係因為我希望阿嬌喺邊度跌低，就喺邊度企番起身，如果連自己地方都面對唔到，咁點樣經得起其他考驗。阿嬌佢已經有晒心理準備，要克服呢啲考驗，無論遇到乜嘢困難，佢都唔會改變，佢會堅強努力咁面對一切，我希望唔接納阿嬌嘅人可以慢慢接受番佢。」
志雲包容阿嬌撒謊
對於有關阿嬌的投訴和批評，《志雲飯局》主持兼無綫總經理陳志雲昨日在電話中說：「對阿嬌今次訪問有不同聲音，呢個係社會正常現象，其實意見同批評都係想令人進步，但有時輿論太一面倒，會令人難以承受，所謂人言可畏，相信大家都唔想見到以前韓國明星因為承受唔到壓力而了結生命嘅事情喺香港發生，希望大家表達意見可以客觀啲、持平啲，用包容嘅心去聆聽，都唔係一件壞事。」
阿嬌年前曾否認與陳冠希（Edison）拍拖，但訪問中卻自爆與男方拍拖4、5年，因而令人覺得她大話連篇及虛偽，對此陳志雲說：「呢個問題我都有問佢，佢話係公司唔准佢講。作為咁年輕嘅藝人，好多事情未必識點樣處理，講大話係唔好，但如果將佢𠵱家同以前講嘅說話嚟做對比，對佢唔係好公平。」
觀眾：唔好再扮天真
此外，《志雲飯局》的阿嬌訪問昨晚在無綫生活台播出，尖沙嘴重慶大廈、九龍城和旺角等多個地方都有大電視在公眾地方同步播放，但收看人流卻不及張栢芝早前的有線訪問般熱鬧。
記者昨晚在阿嬌訪問播出期間，在重慶大廈外進行街訪，結果支持與反對阿嬌復出者各佔一半。劉先生說：「唔接受佢復出，佢係人哋偶像，做錯事就話知錯能改，令好多年輕人做事前唔會三思，以為做錯事就會有人原諒。」另一位不願透露姓名的資深輔導工作者說：「人人都有錯，最緊要知錯能改，再出嚟嘅話真係要真心悔改，洗心革面，唔好再扮天真。我覺得佢喺訪問度未夠坦白，未夠徹底，冇交待點睇陳冠希。」
採訪：林妃、麥佩儀、楊潔雯
攝影：陳慧安
小八卦：激動爆壓力性風疹
鍾欣桐日前接受陳志雲訪問時，每逢激動落淚，頸及鎖骨位就會出現一撻撻紅痕，家庭醫生關嘉美昨日指她可能患了壓力性風疹，她說：「係緊張嘅表現，可能係壓力、緊張性引起嘅風疹，程度主要視乎每個人承受壓力嘅能力，同身體過敏程度、體質年紀有關。呢類風疹香港人都好常見，好嚴重嘅會令到口、鼻腫脹，影響呼吸，咁就有危險囉。」
關嘉美又謂壓力紓緩後，出疹情況可以自然散退，她說：「都可以食藥治療，食抗組織胺退化敏感度啦，訪問前食抗組織胺都可以，鎮定劑只會令佢個心唔好跳得咁犀利，係幫唔到皮膚。」她又提議阿嬌可以穿着天然質料及平滑衣料，如純棉及絲質等，避免穿羊毛、絨毛或化學纖維做的衣服，減少誘發敏感。
