新世界中國（917）係同級內房股當中，折讓數一數二嘅股份，土儲又極豐厚，收集等迎第二春。新中最新NAV7.75元，現價（1.80元）折讓近77%，同新中股東權益近磅嘅內房龍頭中國海外（688），冇折讓兼P/B企1.5倍樓上，講折讓吸引，新中跑出。
新中手頭土儲高達2810萬平方米，老實講，呢期金融海嘯，全世界無運行。但唔好計多，以新中現有土儲，中線以每平方米增值100蚊計，已經可以為新中增值/獲利28億銀，相當於新中每股0.73元。祖國樓市經濟一復蘇，加埋新中充裕土儲，可以為集團中線增長，提供極大嘅爆炸力。再講，新中最新淨負債比率33%，水位又極之安全，冇有好怕。買新中，擺長線，就以重秤前NAV計數，博折讓收窄到50%，新中現價都講緊要升1.1倍，到3.87元，仲未有耐追到同級股份嘅P/B水位。
第一上海啱短炒
第一上海（227）上個月發盈警，預期08年度（12月底止）會盈轉虧。金融海嘯上年下半年吹到澎澎聲，影響到第一上海，一啲唔出奇。但要咁睇，第一上海最新每股淨現金0.47元，係現價（0.63元）75%，NAV折讓又高達66%，兩個數據，有唔錯嘅墊底作用。再講，阿爺呢期救市唔手軟，博阿爺推出有利中港股市經濟措施，第一上海肯定受惠。嚟轉短打，喺橫行區0.60元至0.86元炒上落，上下波幅講緊43%，咪話唔和味。
錢雋