社民連真係乜都做得出！3.8婦女節前夕，長毛噚日同一班女戰友殺上政府總部，抗議港府婦女政策不足，漠視女性權益。為顯示身同感受，長毛不惜搽埋唇膏兼畫眼影，即場解開馬尾，展示長長「秀髮」，話要「有於內，型於外」為女權發聲，有在場女士形容長毛造型好Scary。
長毛則話比起以往抗爭手段，今次扮女人濕濕碎，佢話有年3.8立法會要開會，佢一度考慮扮女人出席，化妝着旗袍去開會，但遭友好極力勸止，擔心佢造型太出位令女性反感，先至作罷。平時示威長毛係焦點，噚日嗌咗幾句「姊姊妹妹站起來！」就讓位畀其他姊妹，冇搶鏡，好有紳士風度。