資深傳媒人屈穎妍自第一個女兒出世後便辭職專心做媽咪，而且還四年抱三。前陣子她出了一本家庭生活小品，以她和丈夫林超榮的智慧，還以為講的是有關培育超級精英的故事，但實情是林家三姐妹好憎返學、愛亂噏廿四得啖笑、打大交兼爆晒缸。
不過兩夫婦都說生仔不是倒模，採無為而治目的只為小朋友有個開心童年。
記者：林佩婷
攝影：伍慶泉（部份照片由被訪者提供）
爆笑妙問妙答
三姐妹讀書成績未必是最好，但跳躍思維絕對是天才級。「近日，9歲起瑩問：『點解十幾歲年輕人夜麻麻喺街行唔返屋企？』而7歲起晴問：『點解中學姐姐咁熱着住件冷衫？』但最爆笑係6歲起菲問：『當年爹哋追你嗰陣你有無走？』，佢以為追係跑步，嗰刻我又突然諗到答：『佢追，我就梗係走喇。』」其他還有喜歡講屎尿屁、品評『麻甩佬』、曾經認為男人都是鹹濕佬、花木蘭是醜女等等。對其他家長而言，這些絕對是禁語，但在林氏家裏，莫講話兩夫婦未必阻止，有時更齊齊九唔搭八。
抗拒保護主義
屈穎妍認為小朋友不能太受保護。「香港保護主義太過份。個人覺得家長成日太擔心，咩都唔俾接觸，其實無咩可能。好似講粗口，周街人都講實聽到，我啲女都知邊啲係粗口，不過唔會講。當爹哋唔小心對住佢哋講，仲會即時話佢唔啱。又好似特登帶佢哋經過美沙酮中心，等佢哋知驚抗拒吸毒。至於打交，係小朋友都打喇，除非係去到好危險情況，否則我會由得佢哋。」
塗鴉媲美插畫家
這本新書還以為是以她的文章做主角，事實卻是大家姐的畫作才是出書契機。「出版社老總同我好熟，有日我哋去飲茶，阿女又開壇畫畫，老總對起瑩啲畫驚為天人，覺得有插畫家一樣水準，話想幫佢出插畫書。最後就用我嘅文章加佢平時嘅畫出了這本書。」但整本書還有兩位妹妹作品，屈穎妍笑說為了交差。「其實老總最愛家姐嘅畫，但如果唔落埋其他兩個，可能佢哋會發癲。」
自畫成材 厭惡興趣班
單看大家姐起瑩的封面傑作，像受到名師指導，原來是自學成材。屈穎妍話佢哋學一陣就投降唔想學落去。歸根究柢，是受不了香港的填鴨式學習氣氛。「香港學習模式有個弊病，為滿足家長希望有成果心理，連興趣班都要考試同發證書，上堂導師就畀張畫照抄，毫無創意。最過份係有次叫佢哋畫長頸鹿，起菲油成紫色，竟然俾導師鬧。其實學畫最緊要俾小朋友天馬行空，先見到童真同創意，根本無絕對答案。有創意反而俾人鬧，咁樣扼殺小朋友創意，上都上得唔開心。畫家朋友Pink直情話如果小朋友愛畫畫，反而唔好俾佢學，因為大人世界有個框框。韋基舜就買講基本功掃描書畀佢哋，果然之後畫得仲好。」
童年生活要開心
「香港教育制度逼到啲女唔願返學，大女更曾經搞到發噩夢，就算起晴成績好都唔想返。喺屋企角度，我哋認為唔使讀書好叻都ok。起瑩讀書雖然唔算叻，但依然盡力做晒功課，無老師投訴過。我覺得做一個好人，比讀書好更重要。返學已經辛苦，我就要令佢哋課餘時間嘅生活開開心心。」
一家爽一爽
《一家爽一爽》內容包括有林氏一家的生活點滴，以及當中引發的生活體驗感受等等，絕對令人會心微笑。
《一家爽一爽》
出版社：天行者
價錢：$88
查詢：27935678
