養過芝娃娃未？筆者就見識過！屋企隔籬常傳來一連串極重低頻嘅狗吠聲；後來隔住道閘發現，佢竟然出自一隻裝得落鞋盒、唔夠8磅嘅白色芝娃娃。日前推出最新《走佬芝娃娃》DVD，大家特別要睇Bonus──LegendOfTheChihuahua，睇完會發現，芝娃娃身世原來一啲都唔簡單！
記者：陳國輝
生於比華利山豪門
一齣《導盲犬小Q》，幾乎搞到逢女必喊；《走佬芝娃娃》剛好相反，會咇出眼淚，不過係笑嗰隻！話說有比華利山超級富豪，一直當依依（芝娃娃）係自己個女，佢身上佩戴嘅鑽飾更價值連城，可惜一次貪玩，誤墮鬥狗集團手上，更被對方視為勒索籌碼，從此改變依依嘅性格。
交朋友講義字
芝娃娃本來只係一隻寵物狗，你好難想像佢有七情六慾，仲識學人講義氣！
其中，最過癮應該係佢位朋友德國牧羊犬（狼狗），牠出生於警察學堂，但因一次意外喪失嗅覺，從此意志消沉，後來仲加入鬥狗集團，變成NO.1打手；直至遇上依依，終於反省要做個「好人」，仲決定捨身幫佢尋回主人！每次暗中幫依依脫險，本是壞人身份，卻想做好人，搞唔清楚，仲以為自己睇緊狗仔版《無間道》㖭！
只得英、泰文配音
《走》屬迪士尼作品，加上主角係港人至愛嘅狗仔題材，絕對有吸引力。不過唔知今次港版3區點解失準，雖然都係靚聲5.1，但就只有英文同泰文配音，廣東話配音完全欠奉，話晒都細路仔片嘛！不過狗仔片，動作表情已經帶住劇情走，小朋友應該一樣睇得咁開心。
Bonus：瞌眼瞓要NG
Bonus必睇刪剪片段，因為有加長版結局；此外NG片都好搞鬼，據知主要成因係隻芝娃娃經常瞌眼瞓，都話動物片難拍啦！另外迪士尼仲專登繪製一輯動畫叫LegendOfTheChihuahua，用嚟介紹芝娃娃嘅傳奇身世，對一班愛狗之人嚟講，呢類Bonus應該非常吸引。
