上期扒冷重心要羅連安特頂得住波爾多，點知半場守到，最後僅敗0:1，令「和/和」泡湯。今期簡單啲，齋玩葡超拿華主場贏賓菲加，經已有4.7倍W。
老實講，葡超呢啲賽事真係吸引唔大，早排無無聊聊先睇咗幾場直播，發覺水準真係好差，連賓菲加同士砵亭都好似唔係太勁。拿華一向靠主場搵食，睇番賓菲加作客勝率又唔高，要扒冷，4.7倍W可以諗一諗；拿華今季主場贏過榜首波圖㗎，波膽博翻冧1:0。
清水浸松鼠抵買
跟住轉玩德甲戰線，啱啱喺德盃同拜仁搏到盡嘅利華古遜，要佢哋半場先落後波琴，開6倍「半勝」。波琴雖然要作客，但近仗半場極少落敗，或者趁利華谷完一輪要回氣，領前半場唔奇。畢竟利華有實力，可吼下半場追和或反勝，開18倍「客/和」或25倍「客/主」。
最後玩埋日聯，松鼠季前未見有太大增兵，巴西射手丹尼士馬古斯及中場朴源載都因傷踢唔到；反而客軍清水心跳有兩經驗射手永井雄一郎及科迪莊臣加盟，博作客贏夠松鼠兩球，[-1]嘅「客勝」有3.8倍，抵買，波膽要0:2（9倍）、1:3（18倍）。文：畢傑