陳志雲：雲 鍾欣桐：嬌
雲：咁你𠵱家出嚟面對群眾，都投入番工作？
嬌：嗯。
雲：你接第一份工作係咩？
嬌：係一個牛仔褲廣告，已經拍咗。嚟緊會去其他地方宣傳。
雲：心情係點？
嬌：都緊張。因為會喺香港、台灣，其他哋方度有PressCon（記招）。
雲：即係要面對群眾？
嬌：係呀，要面對記者，其實我都幾驚面對記者。
雲：驚咩？
嬌：可能大家會一路以嚟覺得我冇乜嘢講，成日黑面，其實可能對我嘅感覺已經係定咗位，再會經過PressCon同埋好多嘅抨擊，咁始終我都會覺得一道牆喺度囉。其實我冇諗過逃避，我好想大家相處得好啲，但大家都真係驚，因為始終佢哋會問我啲好尖銳呀，或者我想像唔到嘅嘢。
雲：除咗廣告之外，仲有乜嘢計劃？電影你公司會唔會為你安排？
嬌：𠵱家揀劇本，但未決定。
雲：最心儀係拍邊類電影？
嬌：我其實乜類型電影，我都想試，因為之前戲路角色太蜻蜓點水，唔夠深入。譬如拍愛情，我冇拍kiss戲，如果一對情侶係冇kiss嘅，或者冇攬嘅，我覺得冇嗰種愛情嘅感覺。我希望有角色係可以深層一啲，但我唔介意拍一啲扮瘋婦呀，我都想嘗試。
公司叫繼續扮學生
雲：出面有講話公司傾緊同劉德華合作，你有冇聽過？
嬌：呢個公司冇同我講過。
雲：想唔想同佢合作？
嬌：希望，我好鍾意華仔。
雲：你係咪鍾意做打女？
嬌：之前係真係好鍾意，因為我覺得係對我嚟講係一條路，但係畢竟𠵱家都28歲，有啲難。
雲：你拍電影都唔少，咁多部，最鍾意邊一部？
嬌：最鍾意係《精武家庭》同《公主復仇記》。
雲：《公主復仇記》應該係04年，套戲諗番轉頭個內容同現實生活嘅你好相似喎？
嬌：初時接呢部戲嘅時候，都驚。
雲：睇見個劇情，點解咁似嘅？
嬌：驚㗎，咁都接咗，就拍囉。
雲：睇到呢個劇本，諗番自己情況，係咪因為咁對呢部戲特別深刻印象？
嬌：都深刻。
雲：原來吳彥祖呢個角色都同好多女仔拍緊拖，你有冇諗番自己嘅情形，Edison都會唔會係咁？當時有冇諗過，有冇問過Edison？
嬌：我有問過，佢話冇，咁我信佢冇。
雲：唱歌方面，會唔會錄歌？再大展拳腳？
嬌：我諗首先會喺廣告同電影方面發展先，唱歌真係要慢慢再試。
雲：如果再唱嘅話，係自己發展定同阿Sa用Twins組合嚟發展？
嬌：我當然想Twins啦，但係暫時都未有安排我喺唱歌方面。
雲：我冇記錯你05年，24歲到時喺台灣出國語碟，係《明愛暗戀補習社》，仍然係學生打扮，其實你覺唔覺得唔好啦，都咁大個？
嬌：有呀，即係可唔可以唔好再扮學生，但嗰段時間都仲OK嘅，即係同期嘅同學都係大學啫，都OK嘅，再過多幾年真係唔好囉。
雲：有冇同公司反映過，你唔好再叫我再做學生？
嬌：有呀，我可唔可以唔好扮學生？話我覺得已經老咗。
雲：公司點講？
嬌：唔，都要扮，繼續扮。
雲：咁你同阿Sa大家咁好，乜都傾，會唔會有啲感情事嘅時候，識咗邊個男仔，大家都會講吓啲密偈。
嬌：都會㗎。
雲：呢個鍾唔鍾意得過呢，呢個好唔好呢，咁有冇？
嬌：咁又冇徵詢意見嘅，因為始終我鍾意嗰個人，你唔鍾意，我都係照鍾意㗎啦，係呀！冇話咩意見，只不過係分享，係呀。
雲：佢有冇啲話，喂，阿嬌，呢個唔掂㗎，你冇話鍾意，佢有冇提過呢啲意見畀你㗎？
嬌：No，佢話佢又唔好喎，我唔鍾意佢。
雲：但你都唔聽嘅？
嬌：嗯，到真係你好深，真係你好鍾意嘅時候，邊個講都唔會聽。
阿Sa曾明踩陳冠希
雲：咁佢有冇叫過你，陳冠希唔好呀？
嬌：都有。
雲：但你都冇聽，有冇試過同阿Sa爭男朋友呀？
嬌：冇呀，因為我同佢taste完全唔一樣，係呀！
雲：咁有冇試過有啲男仔追唔到阿Sa，或者追唔到你，追另外一個？
嬌：冇。
雲：你咁肯定？
嬌：咁我唔知，佢冇講。
雲：方力申嗰時好似話追唔到阿Sa所以追你？
嬌：梗唔係，佢好似冇追過阿Sa，好似冇呀，真係。佢哋係朋友，好朋友。
雲：幾肯定，好有自信？
嬌：係呀。
雲：你係咪好容易鍾意一個男仔嘅人嚟？
嬌：有好感囉，咁到你考慮即想唔想同呢個人一齊嘅時候，你會真係切切實實去諗實在啲嘅嘢囉，即係有冇將來呀，或者即佢負唔負擔到呢個責任，咁囉。唔係即人哋擔張凳畀我，我就覺得佢係好人囉，係呀。
雲：但會唔會有好感，對你好就有好感？跟住真係再進一步，就諗實際問題喇？
嬌：係喇，就會開始睇下呢個人係咪真係好人
雲：Juno（麥浚龍）呢，佢好支持你？形容你係一個好好好好好朋友，你對佢有冇好感呀？
嬌：佢係一個好人囉。
雲：阿嬌你有冇諗自己幾時會結婚？
嬌：有諗過囉。
雲：拍戲要投入感情？會唔會令你好多時都投入同個男演員戲假情真咁樣？
嬌：好少有感情戲，但做朋友囉。每一部戲拍完，我都真係交到啲朋友，幾好。
雲：Juno會唔會係最近交嘅一個好朋友？佢同你幾時合作過？
嬌：《破事兒》嘅時候，之前已經識。
雲：佢好支持你，發生咁多事之後。
嬌：係呀。
雲：佢形容你係一個好好好好好好好朋友。
嬌：係咪真係有咁多個好字呀。
雲：我又冇數過有幾多個好字呀。
嬌：真係唔知呀。
不排除情歸Juno
雲：你覺得Juno點？
嬌：好有義氣，由頭到尾都好支持。
雲：你對佢有冇好感？
嬌：佢係一個好人囉。有好多人會覺得佢好似借我上位，我又唔覺得係囉，因為我覺得冇必要。
雲：佢經濟上有冇支持你呀，你呢一年冇入息？
嬌：冇呀，我冇問過任何人借錢呀。
雲：你夠錢用呀？
嬌：OK，我唔鍾意問人借錢囉。
雲：咁其實你覺得同Juno有冇發展可能？
嬌：呀，我覺得呢啲嘢，遲吓都可以諗嘅，但唔係𠵱家嘅時候。
雲：但𠵱家你同佢都有交往嘅？仲係好好朋友嚟嘅？
嬌：係朋友，好好嘅朋友。
雲：阿嬌你有冇諗自己幾時會結婚呀？
嬌：即我以前從來都冇諗過要結婚㗎，但呢一年裏面我突然間即係，呀，有諗過囉，呀，即會諗希望搵到一個可以包容我呀，即可以照顧到我嘅人，咁結咗婚算喇，我唔想再面對咁多，咁大嘅壓力或者問題囉，但真係搵唔到。
雲：如果呢一年有人同你提出話我娶你呀，你差唔多可以話佢只要包容到我，咁你都肯嫁。
嬌：咁又未必，咁我都要鍾意先得㗎。
雲：咁你鍾意邊一類嘅男仔呢？
嬌：有，有大志囉，同埋最緊要積極咁樣做嘢，我唔鍾意一啲好小家呀，或者好斤斤計較嘅人囉，我唔鍾意，鍾意一啲man啲呀，有志氣啲嘅人。
「冇問題唔可以解決」
雲：同你傾到呢度呢，問你最後一條問題，你𠵱家預備全身投入娛樂圈嘅工作，又再次發力，萬一觀眾仍然唔係太接受你，你會點呢？有乜打算呢？會唔會放棄呢？
嬌：我諗我唔會放棄囉，因為，其實我知道嚟緊條路係好難行，但我支持到呢一刻，我唔會咁輕易放棄囉。身邊好多人支持我，如果我咁輕易放棄嘅話，我會覺得好對佢哋唔住囉，同埋，即係，絕處逢生囉，我覺得冇一個問題係唔可以解決嘅。我覺得就算其他嘅人有乜問題嘅話，身邊好多嘅人都可以幫佢哋解決咗個問題，同埋好多人係，真係好關心囉。所以我為咗一啲錫我嘅人我唔會咁容易放棄囉。
雲：我都相信嘅，我信天無絕人之路，只要我哋努力去行每一步呢，一定會搵到新嘅生機，咁我喺度衷心祝願阿嬌有好好嘅前程，同埋最緊要遇到乜嘢困難，你一定要勇敢去面對，祝你有個愉快嘅人生，開展你新嘅一頁。
嬌：Thankyou。
全文完