特首、高官成日吹噓要將香港打造成高科技港、中藥港、鮮花港、紅酒港，假大空說話講完又講，始終一事無成。立法會旅遊界議員謝超人建議捨短取長，發揮香港人八卦優勢，闢地設立風水街，提供祁福、求籤、算命、睇風水一條龍服務，背靠祖國，立足香港，服務全球，全世界大迷信，yes,wecan！
謝超人：風水吸遊客
大家咪以為謝超人只係順口開河，八方收到風，旅發局去年的確構思利用風水玄學吸引旅客，仲諮詢過本地風水大師意見。可惜旅發局捉錯用神，建議搞旅行團嚟香港睇城市風水局，而唔係嚟算命睇相，行程毫無吸引力，成件事不了了之。
旅發局想搞風水旅遊，係因為近年多咗好多內地客嚟香港問前程，甚至禮聘風水師陪同返內地指點迷津，謝超人認為業界應該把握呢個機遇，早前初步向政府建議設立一條風水街，集中開設算命檔、風水舖，兼賣風水飾物擺設，方便善信求神問卜許願祈福，成行成市肯定成為旅遊亮點。
謝超人話香港唔止係國際金融都會，仲係亞洲玄學之都，佢指好多本地風水師名揚省港澳，紅遍星馬泰，足跡遠至歐美加，每年輸出風水專業服務總產值可觀，與其肥水外流，不如集各家所長，一齊留港建港啦。
至於風水街設於何處，謝超人話西港城、廟街都ok。旅遊景點最忌只得硬件而無軟件配套，設立一條祈福街容易，如何搞得有聲有色吸引人去先考功夫。唔使抄襲迪士尼歌舞巡遊，引入七情上面打小人仲好，遊客最鍾意呢種獵奇式玩意，打小人過程又互動，有怨憤者可自行動手，你話幾好玩呢！
篤信玄學，即係不問蒼生問鬼神，因此祈福街絕不能缺少求籤呢項服務，八方建議港府指派發叔做「靈籤專員」，唔係由佢代勞求籤，而係搵佢事先求晒所有下籤、下下籤出嚟，咁其他人自然支支上籤，皆大歡喜。
可搵陳振聰做代言人
官僚迷信旅遊大使、禁毒大使宣傳效果，祈福街少不免都要搵個代言人，唔使公投，不用普選，非千億風水師TonyChan莫屬！風水救港，全城有運行。
mailto:[email protected]