港台新電視節目《激辯》有啲似微型立法會，頭四集搵咗葉劉火併毓民，兩人都唔係善男信女，嗌交唔係人咁品，觀眾對呢對孖寶好受落，就算喺星期六晚7點鐘呢個非黃金時段兼在弱台亞視播出，首集收視率竟然都有3點，第二集仲急升去到5點，可能係亞視最高收視節目，監製謝志峰真係飲得杯落。
吸引收費台垂涎
噚日兩位惹火尤物為第三集錄影時，廣播處處長黃華麒特別去探班，開香檳祝捷，多謝兩人交足戲，令節目收視節節上升。台長笑言兩人一為神功，二為弟子，辯論時最好加多兩錢肉緊，幫亞視救亡也。毓民封咪後，終重拾喺電視台鬧人滋味，噚日笑逐顏開；葉劉忽然成為名嘴亦好興奮，笑言只要鬧得有道理，唔使大聲都有人聽。
《激辯》受歡迎，連收費電視台都垂涎，有線、now同香港寬頻都罕有地要求港台提供節目畀佢哋重播，熱捧程度嚇親港台！葉劉同毓民做完四集，下Round輪到卿姐硬撼劉江華，兩人喺新東鬥足十幾年，激辯值得期待。