鍾欣桐今晚在無綫收費台播出的《志雲飯局》訪問中，詳談與陳冠希的一段情與淫照事件，其間多次忍不住落淚，下為訪問內容。
鍾欣桐：嬌 陳志雲：雲
雲：阿嬌，我諗大家都好關心一件事就係，差唔多一年前，就係陳冠希（Edison）嘅所謂艷照，或者有啲人叫淫照嘅事件曝光，突然間唔見咗你一段時間，咁𠵱家過咗差唔多成年，你嘅心情平復番未？係咪已經可以好坦承去面對呢件事嘅過去？
嬌：平復番啲啦！係喇，但其實要我提，我真係唔係好想再提，但係我真係一路都冇諗住去隱瞞呢件事，只不過係冇機會畀我去講番囉。
雲：你今年幾多歲，你介唔介意講？
嬌：28。
雲：28歲喇，入行前，甚至入行之後，你咁大個女，一定都會試過拍拖，戀愛經歷一定會有。當然可能係從事你工作嘅問題，公司係咪時不時都要你保持番一個玉女嘅形象，就算拍拖都唔好公開講。
嬌：其實我一路都冇話自己係玉女，係呀，咁公司都冇話一定要塑造我係一個玉女，只不過係我哋個market係小朋友，咁樣就想多啲正面啲嘅活動，同埋我哋出兒歌碟，都好正面嘅教材囉，所以大家會覺得你哋就係玉女。
雲：即係希望保持唔好太多緋聞呀？
嬌：係呀，even我拍戲啦！都唔可以有kiss戲，我未試過拍kiss戲，因為我緋聞比較多，咁就唔想再有一啲kiss嘅鏡頭呀，嗰啲會更加多呢啲新聞。
雲：但係期間你總會拍吓拖，會唔會覺得好辛苦呢？拍拖又唔講得，又唔畀得人睇，但記者有時又會追訪你喎。
嬌：其實都辛苦，但係好似個趨勢就係最好就唔好話畀人聽，係喇！咁既然大家都話唔好話畀人聽，咁咪唔好話畀人聽囉。
雲：即使有人問到，都惟有係否認啦！
嬌：嗯嗯嗯（點頭）。
雲：你係點樣識Edison，係咪入行之前已經識？
嬌：入行之前識嘅，係呀，咁就係朋友嘅朋友囉，係呀！但嗰時就唔係好熟嘅。
雲：幾時開始真係同佢熟絡，係談戀愛？
嬌：啱啱入公司嘅時候。
雲：係因為拍你嘅音樂嗰個MV？
嬌：之前已經係。
雲：佢會唔會係你認識咁多男朋友之中，關係維持得最耐嘅一位？
嬌：算係最鍾意。
雲：大家交往幾多年？
嬌：拖拖拉拉、離離合合都有4、5年。
雲：中間有試過有拗撬，又分開，再一齊，又再分開。（阿嬌不停點頭）但你有冇試過同一時間同佢一齊嘅時候再同另一個人拍拖？
嬌：通常同番佢一齊我就冇其他囉，因為佢影響我都幾深，點講呢，同佢一齊我好難再投入另一段感情。
雲：你係對佢一見鍾情嘅感覺？
嬌：都係㗎，都係（點頭）。一嚟佢都幾識𠱁人，咁好開心囉，even一個message呀，我就會好開心囉。
雲：你最鍾意佢嘅乜嘢呀其實？
嬌：我都唔知（笑），我都唔知，即係我覺得感情冇得解釋。
雲：你啱啱提佢好識𠱁人，佢點樣𠱁你令你開心？
嬌：好少，即係一個message已經好開心囉，因為可能真係一係就唔搵，有時可能一個message已經會好開心囉。
雲：咁你同佢一齊，有過咁親密嘅關係，點解你會願意同佢拍一啲咁親密嘅照片呢？
嬌：我唔知呀！真係唔知呀！即係唔想失去囉，可能係囉。
雲：你嘅意思係拒絕就驚失去咗呢個男朋友呀？
嬌：嗯。
雲：你影完相之後，第一次呢，你會唔會好擔心有機會流傳咗出去？
嬌：喺未影之前都已經好擔心，因為我會不停問你會唔會小心啲放呀？你點樣處理呀？佢會話你放心啦，因為裏面都有我㗎嘛，所以唔會有人睇到或者乜嘢。咁係囉，都放心啲（此時緊皺眉頭）。
雲：你會唔會覺得好似一個計時炸彈喺自己嗰度，唔知幾時會爆發？
嬌：會呀！好耐囉，因為呢一樣嘢好影響我情緒，所以有時啲人會覺得我點解成日黑面，但其實我唔係黑面，因為可能我唔開心，或者好多嘢諗。
雲：你有冇同你嘅親人講過，或者你好信得過嘅人講過，我拍咗啲咁嘅相？
嬌：冇。
雲：咁你有冇問佢影呢啲相嘅目的係乜？
嬌：自己睇囉。
雲：喺網上面有呢啲相，你當時一睇到個反應係點？
嬌：好驚。
雲：你有冇搵過Edison？
嬌：有。
雲：Edison有冇畀過任何電話或者訊息你同你道歉？
嬌：都幾心灰意冷，之後我都有打畀媽咪囉（哭泣中），我喊得好犀利。
雲：記得呢件事已經發生咗一年，舊年08年1月底傳出呢啲相，你點樣知道網上有呢啲相？係有人話畀你知定係自己睇到？
嬌：有人話我聽，跟住我就上網睇到。
雲：當時一睇到咁你反應點？
嬌：好驚，除咗驚唔知可以做啲乜嘢，嗰一刻想辦法，有冇可能張相會消失呀？但冇可能，網上流傳得好快，即刻有好多電話，嗰刻真係唔想同人講嘢，想逃避。
雲：有冇搵Edison，睇到呢啲相之後？
嬌：（點頭）有，搵唔到。
雲：佢有冇搵你？
嬌：冇。
雲：完全冇溝通過？直至𠵱家Edison有冇畀過任何訊息或者電話同你道歉呀？
嬌：冇，我一個人承受咗咁多壓力，好想有一個道歉或者安慰，但到𠵱家都冇。
雲：佢𠵱家公開道歉，話所有受影響女仔過番自己嘅生活，快樂同健康，你點睇佢呢番說話？
嬌：我覺得佢同出面點講都唔重要，最起碼應該同我哋講聲發生乜嘢事。知道啱啱發生呢件事第一時間想搵佢求證，但搵唔到嗰刻好徬徨，嗰刻唔知點做。
雲：印象中我記得你係第一個出嚟面對記者，開記者招待會，雖然記者招待會好短，係你意思定係公司意思？
嬌：初時係好唔想面對，因為面對唔到，招待會時間太倉卒，未有心理準備出嚟之下開記者會。我最想男方出嚟講嘢，講咗嘢到我講嘅時候先知講乜，但又唔知講乜好，因為冇人話有呢件事發生，咁出嚟應該講有定冇呀？啲人怪我好唔認，問題我冇唔認，我唔知應該講啲乜嘢，嗰時好亂，真係冇嘢可以講，因為當時好驚，好多閃光燈睇唔到前邊，除咗驚就係呆咗，Charlene（蔡卓妍）都呆咗，大家都好驚。我再講多兩句真係會忍唔住喊，Mani見到我講唔到嘢就拉我入去後邊。