電影裏的貓，都是善解人意的，由《貓之報恩》、《加菲貓》到即將上映的《貓咪咕咕》，都由可愛貓仔做主角；現實世界裏的貓，也不一定是孤高的，本地創作團隊「貓室」主腦John與女友Pam謂他們的創作與貓不可分割，「貓仔有時仲識得講故事畀我哋聽㖭呀。」說穿了，不過是寶貝貓給他們無限創作靈感。
記者：蒙為亮
攝影：伍慶泉
貓咪活潑好動
進入John與Pam的「貓室」，眼前一亮，嘩，簡直亁淨得要命，令我霎時羞愧，「人養貓，我養貓，我點解養得咁污糟？」John像看穿我心中所想，說：「呢個貓室係我其中一個Homeoffice，話晒係自己做嘢嘅地方，當然唔可以太混亂太污糟啦。咪睇好似好亁淨企理咁呀，阿正同姣姣兩隻嘢有時都會搞亂檔，擒高擒低周圍跳，真係激死人。不過有時我做嘢做到發晒呆，佢哋又會主動撩我，周圍郁，喺我面前掩掩映映，逗得我不知幾開心，帶畀我好多創作靈感。」現場所見，這兩隻貓果然活潑，追趕跑跳碰，無一刻肯停下來。
Pam和John和貓仔結下不解緣，一切由中四那年夏天開始，「由細到大自己都超鍾意養貓，我覺得貓很有型，只做自己鍾意做嘅嘢，簡直係性格巨星。」John回憶：「中四嗰年，阿媽終於應承畀我養貓，咁啱街市檔有隻貓生咗成竇貓仔，阿媽執咗隻返屋企養，佢就係阿正嘞。姣姣呢，係Pam屋企附近嘅一隻流浪貓，我買嘢食餵佢，餵多幾次，發現佢好鍾意黐住人，又會圍住我身邊四圍轉，所以就改佢個名叫姣姣，點知改完名先知出事，隔咗幾日，我哋先發覺佢原來係貓仔，唔係貓女。」其實都幾錯摸，看貓樣，單聽貓名，我都以為姣姣是貓女，怎料牠竟是女兒心男兒身。
貓咪是性格大師
創作團隊「貓室」成立於2004年，由John、Pam、阿文、Edwin、Ray及負責音樂創作的陳一言組成，專設計動畫作品，曾與可口可樂、鴻福堂等品牌合作廣告動畫創作，短短時間內已獲得不少國際性獎項，更憑《動畫鏗鏘集》這段動畫短片，獲三藩市「FlashForwardFilmFestival」的最佳動畫大獎及韓國「SENEFFilmFestival」的最佳網上動畫獎。他們的創作，與動物形影不離，尤其最愛的是可愛貓仔，若非如此，創作室也不會叫貓室。
負責故事創作的Pam說：「由細到大，我都好鍾意睇關於貓嘅卡通片，好似日本卡通《烏冬貓》主角貓子小姐，所以無論寫Blog寫書，我一直用『貓子餅餅』做筆名，2004年一心搞設計單位，我即刻諗起『貓室』呢個名。」John補充：「其實用人做主角都有好處，不過用動物創作故事，限制會少好多，以貓為例，貓本身性格鮮明，想像空間相對較多，可以塑造更多唔同角色，就好似阿正同姣姣平時爭寵一樣，你抱住一隻，另一隻會扭計，到你兩隻一齊抱，原先一隻又會覺得無面走開，真係唔知好嬲定好笑。」
貓咪豐富想像力
《貓咪咕咕》的宣傳海報是幅人貓合照，女主角抱着寶貝貓，感覺好Sweet。我和他們一起看試影會，Pam喊住說好感動，因為：「我同電影女主角麻子一樣，大家都有隻得意貓，仲要大家都係畫漫畫為生，所以對呢個古仔好有共鳴。最Touching係女主角隻貓仔就嚟過身，同女主人講一句：『主人，我真係好希望同你一齊老死。』之後喵一聲就……我忍唔住喊咯。」說到此，感情豐富的她又再次眼紅紅，男友John見狀轉話題：「我反而覺得呢套戲寫實得嚟又幾抵死，有好多笑位，套戲講貓有思想曉諗嘢，我認同呀。養貓，真係可以豐富創作人想像力，身邊班Artist好似小克、StellaSo都有養貓，好多人話貓會釋放一種腦電波影響人類思考，所以養貓嘅創作人一般都比較Creative……」果然是創作人，好端端的在談貓經，竟可以鬼扯到這個地步，雖然有點離譜，不過有一點我可以肯定，就是兩位主人對阿正和姣姣都愛護有加，否則兩隻貓仔又怎會如此肥肥白白？
姣姣（1歲半）
性格：蠱惑，喜歡撒嬌嗲人，常偷食；嗜好爬高擒低，經常打呵欠。
阿正（10歲）
性格：大哥格，要型，愛擺Pose，有正義感，不貪心；嗜好玩假老鼠，貪睡。
牠們在爭寵……
貓仔入門必備
IRIS-E480加高貓沙盆$140
一般貓沙盆比較低矮，這款加高了四邊，減少貓咪如廁後帶沙到外面的機會。
Drinkwell電動飲水器$450
有過濾網和活性炭濾芯，徹底過濾泥沙毛髮，保持食水清澈。
IRISKF-100抗菌貓沙$55
100%純松木製造，能自然分解，保護環境，有效抗菌消除異味。
felidae天然貓糧$135
用雞肉、火雞肉、羊肉、鯡魚4種人類食用級食物製造，可溶性纖維幫助消化。
售賣點：繽紛寵物美容（27628033）
地址：土瓜灣宋皇臺道2c
《貓咪咕咕》簡介
改編自日本少女漫畫家大島弓子的《咕咕是一隻貓》，該作品於2008年獲手塚治虫文化獎短篇單元，內容講述麻子（小泉今日子飾演）這女漫畫家，經常於漫畫中描繪愛貓，愛貓莎娃死亡後，她哀痛得不能執筆。一天，來了一隻叫咕咕的小貓，慢慢撫平麻子的傷痛，以為一切向好，卻發現自己身染重病……
上映日期：3月5日
