車仔Mini一直係潮人熱捧三甲之列，車仔細唔代表唔易壞，錫車就要定時定候睇睇佢，尤其梅雨天，Brake或引擎出問題就倍添危險。搵嚟從迷Mini到開車房專修Mini嘅Joe哥過幾招，佢專業到如醫生診症，車仔除百病，踩啖油都精靈過人啦！
記者：梁美甜
攝影：譚盈傑
Model：Wing（StageModels）
Joe哥話Mini未轉款前穩定性較現時MINI低，自不然有唔少小問題出現，好似漏油呀、響聲咁。唔多加留意就變大問題，會影響到波箱、氣泵同迫力等部份。
常見病例1
漏油引致死Brake
Joe哥由玩Mini、儲Mini，到修車又改車，新舊車款熟晒，佢指出，舊款Mini由於車身設計上嘅某些原因，令Parts較易出現漏油情況，唔Check住，有可能令迫力失效，唔想炒車就要跟住Check啦！
CheckPoint
曾先要留意嘅係風泵，該處最易有漏油情況，一見風泵漏油就要即時更換。若然係棍仔車，見到極力子總泵、極力子風泵又或者分壓器漏油，都即是話個Brake出問題，會隨時失靈。另外若發覺尾Brake積死郁唔到，亦意味風泵積死，分壓氣同風泵會因而漏油，部車會無Brake！
常見病例2
怪叫失方向
部車無問題嘅話，就當然唔會嘈喧巴閉有怪聲，有聲即有零件爛咗或壞咗，會造成軚攞極唔正、指向錯同Brake無效嘅情況。
CheckPoint
舊Mini好多時係「玩具」，好多車主唔係日日揸，部車擺多過行。日久失修，肯定出問題，最常見係引擎拉捍霉爛，焊口分離唔穩陣梗係有聲響。如果加埋尾喉、頭轆、啤軨都響成交響曲咁，就更加出事。所以揸車都唔可以淨係用眼，仲要用埋耳聽。
及時進「補」
定期抽脂換油
「脂」唔係指脂肪而係指車嘅Brake油，Joe哥指錫車就最好一年換一次Brake油同風隔，舊Brake油要抽走才再注入新油。Joe哥指一般Brake油已經好夠用，唔需要用所謂貴價高性能油。若果部車常用，個風隔就要半年換一次，而想個Brake更耐用，可改換一些強化Brake碟或卡鉗，性能提升之餘失效風險亦可減低。
強化Brake碟減風險
舊Mini煞車鼓碟以鐵料打造，身重散熱慢，若換上輕身而散熱強嘅銻質煞車鼓碟，可提升煞車性能同持久性。原裝煞車卡鉗為雙煞，換上4煞車鉗可強化煞車性能。煞車會令迫力皮損耗，換上耐熱迫力皮，就可減低煞車聲響，磨蝕更少迫力粉，性能高又亁淨企理。
1.Brala鋼喉，一套4條，$700/套
2.英國MiniSpares銻質煞車鼓，$2,000
3.英國EBC強化煞車皮，$500/對
4.4煞鮑魚連通風碟，一套兩Set，$6,000起/套
5.強化煞車碟，一套2隻，$1,000/套
minipit（23641666）
地址：土瓜灣旭日街1號A舖瑞英工業大廈地下