澳門「醉駕式」入境政策令人髮指，港大法律學院院長陳文敏去演講不得其門而入，唔少澳門人慨嘆學術自由亮紅燈。當地傳媒好唔客氣批評有人自作聰明，令澳門如「鐵幕城市」，港大法律學院助理教授張達明日前不惜做白老鼠「闖關」，測試吓澳門係咪針對港大學者，但係竟然通行無阻，逗留澳門期間，亦唔覺被人跟蹤。
會唔會澳門只係封殺院長級人馬？張達明估計自己未上黑名單，亦可能因為澳門政府受到輿論壓力而開綠燈。八方猜測，可能澳門誤會佢係藝人張達明，以為佢去棟篤笑啩。澳門指陳文敏係危險人物，張達明認為港府應該明確回應，因為陳教授有唔少公職，亂扣帽子好唔公平。