均富會計師行去年底做咗個《國際商業問卷調查報告2009》，訪問咗36個地區、超過7200個私營企業高級行政人員。咁啱後日就係三八婦女節，均富趁機公佈有關女性嘅調查結果。
原來香港有80%嘅私營企業，有女性出任高級管理人員，比07年少咗3個百分點，喺全球36個受訪地區排名亦跌咗一級，到第五位。而私營企業高層入面，就有28%係女性，即係大約每4個高層，就有1個係女性。
中國內地請女高層嘅企業仲多，有81%，但比兩年前少咗10個百分點，唔通吳儀一冇做副總理，女性即時冇咁馨香？台灣亦有91%企業有請女性高級層，比兩年前嘅80%進步咗好多。最令港人跌眼鏡嘅係，排第一嘅竟然係菲律賓，有94%嘅企業有請女性做高層，而女高層比例仲佔咗47%，咪再以為全部賓妹都係菲傭。
見到呢個調查結果，華華就諗起梁高美懿，梁太嚟緊5月會過檔恒生做行政總裁，成為恒生史上首位女大班，證明男女平等唔係得個講字。