瘦田冇人耕，維園多人爭。民陣同泛民議員初步同意合辦今年7.1遊行，立法會議員李卓人2月25號即刻向康文署book場，申請7.1下午租用維園足球場。佢以為四個幾月前預早留場冇問題啦，點知都唔夠快，已經有團體提出7.1租用維園足球場。
神秘團體搶閘
阿人同八方講，同民陣爭用維園嘅團體叫做「捍衞人格尊嚴協會」，聲稱7.1同「老香港協會」及其他外國團體，喺維園舉行「司法大革命，反貪污、反腐敗」集會兼遊行，時間同7.1遊行一樣，都係下午3點鐘，即係撞到正！
呢兩個團體係何方神聖呢？阿人話恕佢孤陋寡聞，真係𢱑頭。佢透露康文署提議雙方自行講掂數，可以平分場地，或者調整活動時間，官方暫時唔表態租畀邊一個團體。以前有左派團體專登租用維園阻礙市民參加7.1遊行，呢兩個名不經傳團體擇日7.1出手，動機可疑，阿人話暫時唔知對方搞邊科，所以不便揣測，會接觸佢哋嘗試協調。
八方四出打聽，終於搵到捍衞人格尊嚴協會副會長李慨俠，佢否認7.1霸用維園，「香港係多元化社會，唔可以畀某一個團體代表晒所有人。」遊行目的係希望改革香港司法制度，佢哋估計有好多律師參加，市民加入無任歡迎，「我哋好謙虛，估計得一萬人參加，但相信當日會多好多人。」佢又話願意同民陣協商如何使用場地，「我哋唔係咁計較。」
負責人多新聞
李慨俠做過水警，曾被頒令破產，後來拍上「新界王」發叔做航運生意，係香港西北航運前行政總裁，幾年前雄心勃勃開辦屯門至澳門航線，但始終未能登陸澳門，只可以去珠海上岸，佢亦喺06年底辭職。07年立法會港島議席補選，報稱任職遊艇教練嘅李慨俠都有交報名表，最終被選舉事務處指部份提名人簽名有問題，致提名人數不足而唔接納佢參選資格。
7.1遊行係香港人大日子，既然年年都要行，八方建議阿人或民陣應該越早留場越好，最好每年7.2就book定翌年7.1。早好過遲，留場要及時。
mailto:[email protected]