星期日是三八國際婦女節。1903年3月8日美國一群婦女走到街上示威遊行，爭取自己的權益，才會有我們今日的自由和平等對待。香港不少現代女性能撐半邊天，為工作為家庭樣樣頻撲，要對自己好啲，也包括食好啲，以下三類美食有補身、keepfit和養顏作用，三種口味切合女性的三種追求！
記者：周靜雯
攝影：梁細權、黃子偉、王文忠
肥媽化妝：非常作MakeUpForeverAcademy
肥媽愛藥膳健美
近年流行以中國藥材入饌，以藥膳來調理身體，預防勝於治療。講到藥膳，找肥媽（MariaCordero）就最啱，皆因她的烹飪節目《肥媽私房菜》，最近加入新環節《藥膳補臟》，肥媽話要向觀眾宣揚保健的重要，「近年都市人的健康是差了，經常有甚麼流感之類的病，全因湯水唔夠，我個節目會教些簡單的藥膳，讓一般家庭都煮得到。」平常媽咪靚湯中出現的南北杏、淮山、杞子、圓肉等，這些其實已是藥膳。
睇天煲湯
肥媽工作忙碌，但依然精神奕奕，佢話，全因湯水充足，「經常開廠拍攝，又要左撲右撲做嘢，還保持身體健康，都是靠飲湯，女人要多喝湯水，促進良好的新陳代謝，人都後生啲！」肥媽教路，女士之湯，最緊要夠潤，如霸王花、無花果、羅漢果等；想皮膚更有彈性，就要多食含骨膠原的食物，如雪耳、海參、牛筋、雞腳或豬腳等。「煲甚麼湯，加甚麼藥材配合，都是一代傳一代，春天要祛濕，夏天要清熱，冬天就要滋補，我是睇天煲湯的人。」近來天氣潮濕，肥媽就教大家煲一個家傳湯水，「將葱頭、葱白、豆腐用來滾魚片或肉片，能夠祛濕，營養更易吸收。」
淮山花膠煲雞湯$40
正如肥媽所講「女人要吸收多點骨膠原，皮膚會更有彈性。」這碗淮山花膠煲雞湯就啱晒，既滋補又養身。湯中加入紅棗，有補血之效，最啱女人飲。
龜苓湯$50
事業女性日忙夜忙，虛火上升，加上春天濕重無精神，這個龜苓湯有新鮮草龜、靈芝，排毒祛濕，另有生熟地及玫瑰花，滋陰調經。
高麗參生熟地杞子燜雞$60
湯之外，藥膳小菜亦有療效。這道燜雞加有高麗參和紅棗，補氣又補血，對女士最有益。
華豐藥業保健藥療營養湯（23122581）
尖沙嘴加拿芬道33-35號發利大廈4樓3室（逢星期日休息）
黃瑩要FitFit乳酪改善腸道
近幾年的纖體潮，食乳酪因而大行其道！無綫藝員黃瑩都話鍾意食乳酪，對腸胃有益，又方便，隨時食到。的確，乳酪當中的乳酸能夠抑制腸內壞菌生長，改善腸道健康，不少腸胃較差的朋友，經常便秘搞到肚谷谷，食乳酪改善腸道狀況後，人都fit啲。日日食怕悶?試吓這家由韓國開到來香港的乳酪餐廳，除了主打乳酪雪糕，更有乳酪沙冰及乳酪蛋糕，低糖低脂，每日新鮮製造，乳酪雪糕還有多種配料如草莓、菠蘿及蜜糖星星等，加埋藍莓醬或桃醬，好味又健康。
低脂乳酪雪糕$27
入口幼滑有奶香，加配料食亦可，$5可加3款，$9加5款。
藍莓草莓乳酪沙冰$30
濃濃草莓香，將乳酪、草莓及藍莓醬製成沙冰，是健康的美味飲品。
BestBerry（24853330）
葵芳興芳路223號新都會廣場2樓217-218號舖
藍莓要樣靚每日$24養顏燕窩
大家都知燕窩養顏，但要好似千嬅咁，每日食一羮冰糖燕窩，持之以恒先會皮膚靚！Sing之天使藍莓（Kibby）都話鍾意食燕窩，但不是日日食因為價錢貴。每日$48，每月$1,440當然貴，但隔日食每日$24，每月$720，好多女仔每月買各式各樣名牌護膚品都唔只呢個價錢！又有大美人李嘉欣、楊千嬅實踐俾大家睇到功效。忙碌女性當然揀即食燕窩，想慳啲，自己煮要識得處理。燕窩店老闆梁生指，「一般燕窩燉半小時就夠，燉太久燕窩會溶；血燕質地軟實較爽，要燉2-3個鐘。」燕窩蛋白質豐富，不能跟鹹或酸的食物一齊煮，如紅棗屬酸性，一齊燉，燕窩會變韌。
原隻木瓜燉冰糖燕窩$68
木瓜內燕窩有5錢，配清甜木瓜肉，滋潤養顏，女士必試！
燕窩豆腐花$48
養顏燕窩（2錢半），再加上鈣質豐富的豆腐花，女人之寶。
天毅金燕窩莊（23741188）
油麻地上海街228號海德中心7號地舖
